თბილისი, 27 აპრილი, საქინფორმი. ალკოჰოლიანი სასმელების მწარმოებელი ადგილობრივი კომპანიებისთვის სააქციზო შეღავათები დაწესდება. სოფლის მეურნეობის მინისტრი ზაზა გოროზია და შემოსავლების სამსახურის უფროსი ჯაბა ებანოიძე ღვინისა და ალკოჰოლიანი სასმელების მწარმოებლებს სასტუმრო „ამბასადორში“ შეხვდნენ და ერთობლივი ინიციატივა გააცნეს.

ზაზა ებანოიძის განცადებით, ახალი ინიციატივის თანახმად, თუ საკონიაკე სპირტის მწარმოებლის მიერ ამ სპირტის მიწოდება ალკოჰოლიანი სასმელების მწარმოებელზე მოხდება, რომელიც აქციზურ პროდუქციას აწარმოებს, საკონიაკე სპირტი აქციზის გადასახადით აღარ დაიბეგრება.

„დღევანდელი პრობლემაა, როდესაც კომპანია ყიდულობს სპირტს, საკონიაკე სპირტის აქციზის გადასახადი არის ერთ ლიტრზე 4.60 ლარი, და მათ უწევთ დამატებითი ხარჯების მოზიდვა, რომ ეს თანხები გადაიხადონ. ახლა, ახალი ინიციატივით კი, როდესაც ხდება სპირტის მიწოდება კონიაკის მწარმოებელ კომპანიაზე, ის თავისუფლდება ამ გადასახადისაგან. ეს გამოიწვევს იმას, რომ კონიაკის მწარმოებელ კომპანიას აღარ დასჭირდება დამატებითი თანხების მოძიება და ისინი თავისუფლად შეძლებენ, ადილობრივი სპირტით პროდუქცია აწარმოონ“, – განაცხადა ებანოიძემ.

სოფლის მეურნეობის მინისტრ ზაზა გოროზიას განცხადებით, სააქციზო შეღავათების დაწესება ადგილობრივი სპირტის მოხმარებას მნიშვნელოვნად გაზრდის.