თბილისი, 26 აპრილი, საქინფორმი. დღეს ევროპის სახლის საკონფერენციო დარბაზში საქართველოს გაეროს ასოციაცია ოფიციალურად ხსნის აშშ-ის საერთაშორისო განვითარების სააგენტოს (USAID) მიერ დაფინანსებულ პროექტს „ეროვნული ინტეგრაციის გაძლიერება საქართველოში“. პრეზენტაცია ეძღვნება პროექტის სამომავლო გეგმებს, მოიცავს გამოფენასაც – „ეროვნული უმცირესობები საქართველოში – ყოფა, ტრადიციები და კულტურა“.

გახსნის ცერემონიას დაესწრებიან: ჯონ ბასი – აშშ ელჩი საქართველოში, სტივენ ჰეიკინი – აშშ-ის საერთაშორისო განვითარების სააგენტოს (USAID) საქართველოს მისიის დირექტორი, სუსან ქოული – „USAID“-ის დემოკრატიისა და მმართველობის ოფისის დირექტორი, რამაზ აფციაური – ეროვნული ინტეგრაციის გაძლიერების პროექტის დირექტორი, თამარ კინწურაშილი – პრეზიდენტთან არსებული სამოქალაქო ინტეგრაციისა და შემწყნარებლობის საბჭოს თავმჯდომარე, ეროვნული უშიშროების საბჭოს მდივნის მოადგილე, გიორგი ტუღუში – სახალხო დამცველი, აგრეთვე, პარლამენტის წევრები, საერთაშორისო სააგენტოებისა და სხვა ორგანიზაციების წარმომადგენლები, სამოქალაქო ინტეგრაციისა და შემწყნარებლობის საბჭოს წევრები, საქართველოს საზოგადოებრივი მაუწყებელი, ეროვნული ინტეგრაციის გაძლიერების პროექტის პარტნიორები, ეროვნული და რელიგიური უმცირესობების საბჭოს წევრები, ქართული არასამთავრობო ორგანიზაციები და სამოქალაქო საზოგადოების ლიდერები.