აქტუალური
საქართველოს საგარეო ვაჭრობა პირველ კვარტალში 17 პროცენტით გაიზარდა
თბილისი, 25 აპრილი, საქინფორმი. საქსტატის შეტყობინების თანახმად, საქართველოს საგარეო სავაჭრო ბრუნვამ 2012 წლის პირველ კვარტალში 2.24 მილიარდი აშშ დოლარი შეადგინა, რაც წინა წლის მაჩვენებელზე 17%-ით მეტია, ხოლო უარყოფითმა სავაჭრო ბალანსმა 1.16 მილიარდი აშშ დოლარი შეადგინა, რაც წინა წლის მაჩვენებელზე 17.4%-ით მეტია.
ექსპორტმა 2012 წლის პირველ კვარტალში 539 მილიონი აშშ დოლარი შეადგინა (16%-ით მეტი), ხოლო იმპორტმა – 1.7 მილიარდი აშშ დოლარი (17%-ით მეტი გასული წლის მაჩვენებელთან შედარებით).
საქართველოს სავაჭრო ბრუნვა დსთ-ის ქვეყნებთან პირველ კვარტალში 7%-ით გაიზარდა წინა წლის მაჩვენებელთან შედარებით და 715 მილიონი აშშ დოლარი შეადგინა, რის შედეგადაც მისმა წილმა საქართველოს საგარეო ვაჭრობაში 32% შეადგინა.2012 წლის პირველ კვარტალში საქართველოს სავაჭრო ბრუნვა ევროკავშირის წევრ სახელმწიფოებთან 621 მილიონ აშშ დოლარამდე გაიზარდა, რაც 26%-იანი ზრდაა წინა წლის მაჩვენებელთან შედარებით. შედეგად, მისმა წილმა საქართველოს საგარეო ვაჭრობაში 28% შეადგინა.
საქართველოს უმსხვილეს სავაჭრო პარტნიორად კვლავ თურქეთი რჩება, რომელთან სავაჭრო ბრუნვამაც 324.18 მილიონი აშშ დოლარი შეადგინა. შემდეგ მოდის აზერბაიჯანი –281.9 მილიონი აშშ დოლარი; გერმანია – 163.1 მილიონი აშშ დოლარი; უკრაინა – 161.2 მილიონი აშშ დოლარი; ჩინეთი – 125 მილიონი აშშ დოლარი; რუსეთი – 121.8 მილიონი აშშ დოლარი; აშშ – 94.7 მილიონი აშშ დოლარი; ბულგარეთი – 83.2 მილიონი აშშ დოლარი; იაპონია – 62.9 მილიონი აშშ დოლარი; ყაზახეთი – 61.6 მილიონი აშშ დოლარი.
2012 წლის პირველ კვარტალში მსუბუქი ავტომობილების რეექსპორტმა ქვეყნის მთლიანი ექსპორტის 19.6% შეადგინა – 105.49 მილიონი აშშ დოლარი; შემდეგ მოდის ფეროშენადნობი – 59.2 მილიონი აშშ დოლარი (11%-იანი წილი მთლიან ექსპორტში); თხილი – 40.38 მილიონი აშშ დოლარი (7.5%); სპილენძის მადნები და კონცენტრატები – 20.3 მილიონი აშშ დოლარი (3.8%); აზოტოვანი სასუქები – 19.7 მილიონი აშშ დოლარი (3. %); სპირტი ეთილის არადენატურირებული – 18.6 მილიონი აშშ დოლარი (3.5%); ოქრო დაუმუშავებელი ან ნახევრად დამუშავებული –17.7 მილიონი აშშ დოლარი (3.3%); შავი ლითონების ჯართი – 17.4 მილიონი აშშ დოლარი (3.2%); სატვირთო ავტომობილების რეექსპორტი – 14.7 მილიონი აშშ დოლარი (2.7%); ხორბალი – 11.7 მილიონი აშშ დოლარი (2.2%).
უმსხვილესი საიმპორტო სასაქონლო ჯგუფი 2012 წლის პირველ კვარტალში ნავთობი და ნავთობპროდუქტები იყო – 181.3 მლნ აშშ დოლარი (10.6%-იანი წილი მთლიან იმპორტში); შემდეგ მოდის მსუბუქი ავტომობილები – 154.3 მლნ აშშ დოლარი (9%); ნახშირწყალბადები – 104.5 მლნ აშშ დოლარი (6.%); ხორბალი – 52.7 მლნ აშშ დოლარი (3.1%); სამკურნალო საშუალებები – 43.6 მლნ აშშ დოლარი (2.6%); გამომთვლელი მანქანები და მათი ბლოკები – 24.9 მლნ აშშ დოლარი (1.5%); ავტომობილები 10 ან მეტ ადამიანზე გათვლილი – 24.4 მლნ აშშ დოლარი (1.4%); ელექტროენერგია – 22.3 მლნ აშშ დოლარი (1.3%); სატელეფონო აპარატები, ფიჭური ან სხვა უსადენო ქსელებისთვის – 22 მლნ აშშ დოლარი (1.3%).
