თბილისი, 20 აპრილი, საქინფორმი. პარლამენტის თავმჯდომარე დავით ბაქრაძემ განაცხადა, რომ საქართველო ელის, რათა ნატოს  ჩიკაგოს სამიტის საბოლოო დეკლარაციაში ჩაიწეროს: საქართველო დღეს არის უფრო ახლოს ნატოსთან, ვიდრე ოდესმე.

„ჩიკაგოს სამიტზე ჩვენ ველოდებით, რომ ყველაფერი ის, რაც დღემდე გვესმოდა, იქნება კონკრეტულად დაფიქსირებული, ქაღალდზე, კანონის ენაზე და დადგენილების ენაზე გადატანილი. ეს კი არის, პირველ რიგში, განცხადებები, რომლებიც არაერთგზის მოგვისმენია, რომ საქართველო დღეს არის უფრო ახლოს ნატოსთან და ალიანსში გაწევრებასთან, ვიდრე ეს იყო ბუქარესტში ან როდესმე წინა ისტორიის განმავლობაში“, – განუცხადა ბაქრაძემ ჟურნალისტებს.

მან იმედი გამოთქვა, რომ ეს დაახლოება და პროგრესი ადეკვატურად აისახება ჩიკაგოს სამიტის დოკუმენტებში.

ბაქრაძემ, ასევე, განაცხადა, რომ საქართველოს საგარეო საქმეთა მინისტრმა გრიგოლ ვაშაძემ 18-19 აპრილს მთელი რიგი პროდუქტიული შეხვედრები გამართა ნატოს შტაბ-ბინაში, მათ შორის, თავის კოლეგებთან ნატოს რამდენიმე წევრი სახელმწიფოდან, სადაც მაისში დაგეგმილი ნატოს ჩიკაგოს სამიტისთვის მზადების საკითხი იქნა განხილული.

3 აპრილს ბრიუსელში პრეზიდენტ სააკაშვილთან შეხვედრის შემდეგ ნატოს გენერალურმა მდივანმა ანდერს ფოგ რასმუსენმა განაცხადა, რომ ალიანსის განსაკუთრებული პარტნიორობა საქართველოსთან ჩიკაგოს სამიტზე სამი კუთხით აისახება.