თბილისი, 19 აპრილი, საქინფორმი. ცხინვალში დღეს სამხრეთ ოსეთის პრეზიდენტ ლეონიდ თიბილოვის ინაუგურაცია გაიმართება. თიბილოვმა  საპრეზიდენტო არჩევნებში ხმების 54,12 %-ით გაიმარჯვა.

ოსური მედიის ინფორმაციით, ინაუგურაცია 13:15 საათზე დაიწყება და, დაახლოებით, ერთ საათს გაგრძელდება. ცერემონიაზე 500-მდე სტუმარია მიწვეული, მათ შორის არიან სტუმრები რუსეთის ფედერაციიდან. ცხინვალში უკვე იმყოფებიან არაღიარებული სახელმწიფოების – აფხაზეთის, მთიანი ყარაბაღისა და დნესტრისპირეთის, ასევ,ე ნიკარაგუას წარმომადგენელი.

ინაუგურაციას დაესწრებიან ექს-პრეზიდენტები ლუდვიგ ჩიბიროვი და ედუარდ კოკოითი. ღონისძიებაზე მიწვეული არიან პრეზიდენტობის ყოფილი კანდიდატებიც.

შეგახსენებთ, 8 აპრილს სამხრეთ ოსეთის ხელახალი საპრეზიდენტო არჩევნების მეორე ტური გაიმართა. 25 მარტს ჩატარებულ პირველ ტურში თიბილოვმა 42,48% დააგროვა, ხოლო დავით სანაკოევმა – 24,58%.