თბილისი, 17 აპრილი, საქინფორმი. პრეზიდენტი მიხეილ სააკაშვილი შაბათს ბოლნისის რაიონში ჩავიდა, სადაც კომპაქტურად ცხოვრობენ აზერბაიჯანელები. დედაენის დღესთან დაკავშირებით ის არაქართულენოვანი სკოლების მოსწავლეებსა და პედაგოგებს შეხვდა. ადგილობრივ მოსახლეობასთან შეხვედრისას სააკაშვილმა განაცხადა: „საქართველოს რეგიონებში ქართული ენის სწავლების შედეგებმა ჩვენს მოლოდინს საგრძნობლად გადააჭარბა. რეგიონებში მასობრივად ვრცელდება ქართული ენის ცოდნა და გეგმაში გვაქვს, რომ 2015 წლისათვის ახალგაზრდობის 100% ამ რეგიონებში ქართულ ენას 100 პროცენტით ფლობდეს. ეს ძალზე ამბიციური გეგმაა, მაგრამ ჩვენ ყველა ამბიციურ გეგმას ვასრულებთ“.

სააკაშვილის თქმით, სხვადასხვა ეთნიკური წარმომავლობის ყველა ადამიანი საქართველოში თავს თანაბრად წარმატებულად უნდა გრძნობდეს. „საქართველო ყველას ეკუთვნის. და ის, ვინც ეთნიკურ ქართველებად და არაქართველებად საქართველოს დაყოფას ცდილობს, პირდაპირ ემსახურება საქართველოს მტრებს. ბოლო ასწლეულის განმავლობაში ჩვენ პირველები ვქმნით კავკასიაში სრულიად თანამედროვე, ჩვენი ეპოქის შესაბამის სახელმწიფოს. და ამ თანამედროვე სახელმწიფოებრიობის პირველი ნიშანი ის არის, რომ ქვეყნის ყველა მცხოვრები მასში თანასწორუფლებიანად უნდა იყოს წარმოდგენილი“, – აღნიშნა სააკაშვილმა.