პოლიტიკა
რუსეთი თავის მოქალაქეებს საქართველოში ჩასვლას არ ურჩევს
თბილისი, 13 აპრილი, საქინფორმი. რუსეთის საგარეო საქმეთა სამინისტრომ ურჩია თავის მოქალაქეებს, თავი შეიკავონ საქართველოში გამგზავრებისგან მათთვის იქ უსაფრთხოების არარსებობის გამო.
მარტის დასაწყისში, მას შემდეგ, რაც საქართველომ რუსეთის მოქალაქეებისთვის ცალმხრივად მოხსნა სავიზო რეჟიმი, რუსეთმა საქართველოს ოკუპირებული ტერიტორიების შესახებ კანონის გადახედვისკენ მოუწოდა. მაშინ რუსეთმა საქართველოს მოქალაქეებისთვის სავიზო რეჟიმის გაუქმების პირობად სწორედ ამ კანონის გადახედვა დააყენა, მაგრამ საქართველომ უპასუხა, რომ ის კანონს არ შეცვლის და თუ რუსეთს საპასუხო ნაბიჯის გადადგმა სურს, მან ეს წინაპირობების გარეშე უნდა გააკეთოს.
რუსეთის საგარეო საქმეთა სამინისტრომ, ასევე, განაცხადა 12 აპრილს, რომ საქართველოს სპეცსამსახურები განაგრძობენ სისტემატურ დაჭერებსა და რეპრესიებს საქართველოში ჩასული რუსების წინააღმდეგ.
სამინისტროს თქმით, 9 აპრილს პრეზიდენტ სააკაშვილის სტუმრობა ყაზბეგი-ზემო ლარსის სასაზღვრო-გამშვებ პუნქტზე და საქართველოში ჩასულ რუსეთის მოქალაქეებთან შეხვედრა მისი პროპაგანდის ნაწილია.
„რუსეთის საგარეო საქმეთა სამინისტრო კვლავ აპყრობს თქვენს ყურადღებას საქართველოში ჩვენი მოქალაქეების უსაფრთხოების არარსებობაზე და გირჩევთ, თავი შეიკავოთ ამ ქვეყანაში გამგზავრებისგან“, – განაცხადა მან.
საქართველოს პრეზიდენტის პრესსპიკერმა მანანა მანჯგალაძემ განაცხადა 10 აპრილს, რომ მას შემდეგ, რაც საქართველომ ცალმხრივად გააუქმა სავიზო რეჟიმი რუსეთის მოქალაქეებისთვის, რუსეთიდან განხორციელებული ვიზიტების რაოდენობამ 30 000 შეადგინა, რაც, მისი თქმით, 70-პროცენტიანი ზრდაა გასული წლის შესაბამის პერიოდთან შედარებით.
