აქტუალური
თბილისი, 5 აპრილი, საქინფორმი. მოსწავლე-გამომგონებელთა საერთაშორისო კონკურსი „ლეონარდო და ვინჩი – 2012“ იწყება. კონკურსი შემოქმედებითი აზროვნების, გამომგონებლის ნიჭით დაჯილდოებულ მოზარდებს გამოავლენს და წაახალისებს, ხელს შეუწყობს მათი ინოვაციური და პრაქტიკული უნარ-ჩვევების განვითარებას.
კონკურსანტის მიერ წარმოდგენილი პროექტი უნდა მოიცავდეს გამოგონების როგორც ტექსტუალურ აღწერილობას, ისე შესაბამის მაკეტს, მოდელს ან ნახაზებს. ელექტრონული რეგისტრაცია 1 აგვისტოს დასრულდება, ხოლო ნამუშევრების წარმოდგენა სამინისტროს შოთა რუსთაველის ეროვნულ სამეცნიერო ფონდში – 16 აგვისტოს. კონკურსის გამარჯვებულებს კომპეტენტური ჟიური სექტემბრის ბოლოს სპეციალურად მოწყობილ გამოფენაზე გამოავლენს.
კონკურსში გამარჯვებული პროექტების ავტორები მედლებითა და ფულადი პრემიებით დაჯილდოვდებიან. I ადგილზე გასული პროექტის წარმომდგენს გადაეცემა 5000 ლარი, II ადგილზე – 3 000 ლარი, ხოლო III ადგილზე – 2 000 ლარი. „გრან პრის“ მფლობელი პროექტის ავტორი ან ავტორები კი სასწავლო-შემეცნებითი ტურით საზღვარგარეთ გაემგზავრებიან.