სამართალი
ვიქტორ ოზეროვი: „საქართველოს განცხადებები სამხრეთ ოსეთში არჩევნების არალეგიტიმურობაზე მომაბეზრებელი გახდა“
თბილისი, 28 მარტი, საქინფორმი. „საინფორმაციო ომი გრძელდება“ – საქართველოს, ევროკავშირის, აშშ-ის განცხადებები სამხრეთ ოსეთში პრეზიდენტის არჩევნების არალეგიტიმურობის შესახებ „რესპუბლიკაში საზოგადოებრივ აზრზე გავლენის მოხდენაზეა“ მიმართული. ეს აზრი სააგენტო „REGNUM“-თან საუბარში ფედერაციის საბჭოს თავდაცვისა და უსაფრთხოების კომიტეტის თავმჯდომარე ვიქტორ ოზეროვმა გამოთქვა, რომელიც 25 მარტს სამხრეთ ოსეთში ჩატარებულ არჩევნებს აკვირდებოდა. „მე ვიყავი სამხრეთ ოსეთში და დავინახე ხალხის სურვილი და მზადყოფნა – იცხოვრონ სუვერენულ სახელმწიფოში“, – განაცხადა ოზეროვმა და დაამატა, რომ სამხრეთ ოსეთის რესპუბლიკა უკვე აღიარებულია არა მხოლოდ რუსეთის, არამედ რიგი სხვა სახელმწიფოების მიერ.
ოზეროვის თქმით, სამხრეთ ოსეთში მიიჩნევენ, რომ მათ ქვეყანაში გამართული არჩევნები ლეგიტიმურია, „ეყრდნობიან რა საერთაშორისო დამკვირვებელთა, მათ შორის, ფედერაციის საბჭოს დამკვირვებელთა, განცხადებებს იმის შესახებ, რომ ამ არჩევნების გამჭვირვალობა საარჩევნო სისტემების ყველა ევროპულ და მსოფლიო სტანდარტს აკმაყოფილებს“. როგორც ოზეროვმა აღნიშნა, უცნაური ის იქნებოდა, ასეთი განცხადებები რომ არ გაკეთებულიყო. „ეს ყოველ ჯერზე გაისმის, ხოლო როდესაც რაღაც ყოველ ჯერზე გესმის – ეს მომაბეზრებელია“, – დაასკვნა ოზეროვმა. 
