საზოგადოება
„ვითიბი ბანკი“ რუსთაველის თეატრს ივანიშვილის ნაცვლად უსპონსორებს
თბილისი, 28 მარტი, საქინფორმი. „ვითიბი ბანკი“ რუსთაველის თეატრს ორი წლის განმავლობაში უსპონსორებს. რუსთაველის თეატრსა და „ვითიბი ბანკს“ შორის უკვე ხელმოწერილი ხელშეკრულების თანახმად, „ვითიბი ბანკის“ მხარდაჭერით, რუსთაველის თეატრში 14 პრემიერა და სხვა ღონისძიებები გაიმართება.
როგორც ხელშეკრულების ხელმომწერი მხარეები აცხადებენ, ეს მნიშვნელოვანი თანადგომა იქნება და თეატრის განვითარებას შეუწყობს ხელს.ამასთან, ბანკის წარმომადგენლები არ აკონკრეტებენ, ბანკიდან რა თანხა იქნება 14 პრემიერისთვის გამოყოფილი.
როგორც „ვითიბი ბანკში“ განმარტავენ, ქვეყნის მასშტაბით ეს უკვე მეორე თეატრია, რომელსაც აფინანსებს. 2011 წლის სექტემბერში ბანკმა ქუთაისის დრამატული თეატრი დააფინანსა, 2011 წელს „ვითიბი ბანკმა“ კულტურული და სპორტული ღონისძიებების მხარდასაჭერად სულ 3 მილიონ ლარზე მეტი გაიღო.
