თბილისი, 26 მარტი, საქინფორმი. აშშ-ის ეროვნულ-დემოკრატიული ინსტიტუტი (NDI) პოლიტიკურ პარტიებს რეიტინგებს დღეიდან ეტაპობრივად გააცნობს. ამის შესახებ ჟურნალისტებს „NDI“-ში განუცხადეს. ორგანიზაცია, როგორც წესი, პარტიებთან შეხვედრამდე მათ რეიტინგებს არ ასაჯაროებს.

რაც შეეხება კვლევის სხვა შედეგებს, მათი პრეზენტაცია „NDI“-მ 21 მარტს სასტუმრო „ივერია-რედისონში“ გამართა. შედეგების თანახმად, არჩევნების მოახლოებასთან ერთად, მოსახლეობის ყველაზე მნიშვნელოვან პრობლემად კვლავ დასაქმება რჩება. რესპონდენტებისთვის უმთავრეს პრიორიტეტებს სამუშაო ადგილები, ტერიტორიული მთლიანობა და ხელმისაწვდომი ჯანდაცვა წარმოადგენს.

კვლევა, რომელის დასახელებაცაა „საზოგადოების განწყობა საქართველოში“, 22 თებერვლიდან 5 მარტის პერიოდში ჩატარდა. საქართველოს მასშტაბით გამოიკითხა 3 161 რესპონდენტი პირისპირ ინტერვიუს საფუძველზე.