თბილისი, 23 მარტი, საქინფორმი. როგორც ადამიანის უფლებების შესახებ ქართული ვებპორტალი ავრცელებს ინფორმაციას, ადმინისტრაციულ სამართალდარღვევათა კოდექსში შესაძლოა, დამატებები შევიდეს, რომელთა საფუძველზეც მედიასაშუალებებს ბრალდებულის იდენტიფიკაციის მქონე ინფორმაციის გავრცელებასთან დაკავშირებით გარკვეული შეზღუდვები დაუწესდებათ.

საკანონმდებლო ინიციატივის ავტორი პარლამენტის წევრი რატი მაისურაძეა. მისი განცხადებით, გარკვეულწილად, უნდა შეიზღუდოს მედიასაშუალებებით ბრალდებულის ფოტო და ვიდეოგამოსახულების იმგვარად ჩვენება, რომ პიროვნების იდენტიფიკაცია არ იყოს შესაძლებელი. თუმცა იქვე აღნიშნავს, რომ გამონაკლისები არ გამოირიცხება. როგორც თავად აღნიშნა, „შესაძლებელია, სასამართლომ წარდგენილ ბრალდებებში პირი უდანაშაულოდ ცნოს და ამ შემთხვევაში უკვე უსაფუძვლოდ შეურაცხყოფილი და შელახული რჩება ბრალდებულის სტატუსით წარდგენილი პიროვნების პატივი და ღირსება, რაც, თავისთავად, ადამიანის უფლებების დარღვევაა და ეწინააღმდეგება კონსტიტუციას“.