საზოგადოება
2011 წლის ბოლოს პირდაპირი უცხოური ინვესტიციები გაიზარდა
თბილისი, 12 მარტი, საქინფორმი. როგორც საქსტატი საქინფორმს აცნობებს, მან გამოაქვეყნა წინასწარი მონაცემები, რომელთა თანახმად, 2011 წლის მეოთხე კვარტალში პირდაპირი უცხოური ინვესტიციების მოცულობა, წინა წლის ანალოგიურ პერიოდთან შედარებით, 58 პროცენტით გაიზარდა და 337 მლნ აშშ დოლარი შეადგინა.
პირდაპირი უცხოური ინვესტიციების დიდი ნაწილი 2011 წლის მეოთხე კვარტალში ნიდერლანდებში დარეგისტრირებული კომპანიებიდან შემოვიდა – 78.7 მლნ აშშ დოლარი; შემდეგ მოდის ლუქსემბურგი – 33.4 მლნ აშშ დოლარი; აშშ – 32.8 მლნ აშშ დოლარი; ბელიზი – 31 მლნ აშშ დოლარი; ბრიტანეთის ვირჯინიის კუნძულები – 27 მლნ აშშ დოლარი; იაპონია – 17.3 მლნ აშშ დოლარი; კვიპროსი – 13.5 მლნ აშშ დოლარი; რუსეთი – 13 მლნ აშშ დოლარი; ავსტრია –9.8 მლნ აშშ დოლარი.
საქსტატის მონაცემებში 51.6 მილიონი აშშ დოლარის ოდენობის პირდაპირი უცხოური ინვესტიციები საერთაშორისო ორგანიზაციებზე მოდის.
2011 წლის მეოთხე კვარტალში ენერგეტიკის სექტორმა პირდაპირი უცხოური ინვესტიციების ყველაზე დიდი ნაწილი – 79.1 მილიონი აშშ დოლარი მოიზიდა; შემდეგ მოდის ტრანსპორტი და კავშირგაბმულობა – 56.6 მლნ აშშ დოლარით; საფინანსო სექტორი – 53.9 მლნ აშშ დოლარით; გადამამუშავებელი მრეწველობა – 53.2 მლნ აშშ დოლარით; უძრავი ქონება – 44.7 მლნ აშშ დოლარით; სამთომოპოვებითი მრეწველობა – 24.4 მლნ დოლარით; სოფლის მეურნეობა – 4.4 მლნ აშშ დოლარით; მშენებლობა – 3.7 მლნ აშშ დოლარით.
