თბილისი, 9 მარტი, საქინფორმი. ნატოს მიერ გავრცელებული პრესრელიზის მიხედვით, ბრიუსელში გამართულ ნატო-საქართველოს კომისიის სხდომაზე განხილულ იქნა, თუ როგორ უნდა გაფართოვდეს საქართველოს პარტნიორობა და კავშირი ალიანსთან.

ნატო-საქართველოს კომისია მთავარი მექანიზმია, რომლის ფარგლებშიც ნატო-საქართველოს თანამშრომლობა, მათ შორის, საქართველოს წლიურ ეროვნულ პროგრამაში დასახული რეფორმების განხორციელება განიხილება. ამ პროგრამას ალიანსი ყოველწლიურად განიხილავს.

სხდომაზე საქართველოს წარმოადგენდა ეროვნული უშიშროების საბჭოს მდივანი გიგა ბოკერია.

ნატოს გენერალურმა მდივანმა ანდერს ფოგ რასმუსენმა მადლობა გადაუხადა საქართველოს ავღანეთის ოპერაციაში განსაკურებული წვლილის გამო.

„ჩვენ, ასევე, ვაფასებთ თქვენს გადაწყვეტილებას, რომ თითქმის გააორმაგოთ მონაწილეობა, – განაცხადა რასმუსენმა . – დღეს ჩვენ, ასევე, გვაქვს შესაძლებლობა, კიდევ უფრო გავაძლიეროთ ნატოს და საქართველოს შორის თანამშრომლობა საქართველოს რეფორმების მხარდაჭერის გზით“.

ნატო-საქართველოს კომისიის სხდომაზე მთელი რიგი ღონისძიებები იქნა შეთანხმებული: „საქართველოში რეფორმების პროცესის შემდგომი მხარდაჭერისთვის, მათ შორის, საჯარო სამსახურის რეფორმირების გაძლიერება, ალიანსთან თავსებადობა, ასევე, საქართველოში თავდაცვის და უსაფრთხოების სფეროზე სამოქალაქო დემოკრატიული კონტროლის შესაძლებლობა“, – ნათქვამია ნატოს პრეს-რელიზში.

5 მარტს პრესკონფერენციაზე საუბრისას რასმუსენმა განაცხადა, რომ ჩიკაგოში მაისში დაგეგმილი ნატოს სამიტი კიდევ ერთხელ გაიმეორებს ალიანსის ღია კარის პოლიტიკას და ვერცერთი მესამე ქვეყანა, ვერცერთი მესამე მხარე ვერ მიიღებს გადაწყვეტილებებს ნატოს სახელით.