თბილისი, 5 მარტი, საქინფორმი. აშშ-ის საგანგებო და სრულუფლებიანი ელჩი საქართველოში ჯონ ბასი განმუხურთან ქართული პოლიციის პოსტზე თავდასხმის გამო შეშფოთებას გამოთქვამს. ის მიიჩნევს, რომ ადმინისტრაციული საზღვრის ორივე მხარეს უნდა იცოდნენ თავშეკავების გამოჩენა.

„ადმინისტრაციულ საზღვარზე ნებისმიერი ძალადობის გამოვლენა ჩვენს შეშფოთებას იწვევს“, –  განაცხადა ბასმა ჟურნალისტებთან საუბრისას და დასძინა, რომ აღნიშნულ ფაქტთან დაკავშირებით მნიშვნელოვანი იქნება ევროკავშირის სადამკვირვებლო მისიის წარმომადგენლების ინფორმაცია. ელჩი მიიჩნევს, რომ მომხდარი ფაქტი კიდევ ერთხელ ადასტურებს პროცესში საერთაშორისო საზოგადოების აქტიურად ჩართვის აუცილებლობას.

შეგახსენებთ, რომ 4 მარტს, 3 საათსა და 20 წუთზე, რუსეთის მიერ ოკუპირებული აფხაზეთის ტერიტორიიდან გადმოსულმა ექვსამდე უცნობმა შეიარაღებულმა პირმა ცეცხლი გახსნა ქართული პოლიციის საგუშაგოს მიმართულებით სოფელ განმუხურთან. ამის შესახებ ინფორმაციას საქართველოს შინაგან საქმეთა სამინისტრო ავრცელებს.

შსს-ის ინფორმაციით, თავდასხმის დროს გამოყენებულ იქნა ავტომატური იარაღი და „რპგ 7“ ტიპის ორი ყუმბარმტყორცნი. სროლამ ათ წუთამდე გასტანა. სროლის შედეგად არავინ დაშავებულა. თავდამსხმელები მიიმალნენ ოკუპირებული აფხაზეთის ტერიტორიაზე.