თბილისი, 2 მარტი, საქინფორმი. ევროკავშირი საქართველოს „სისხლის სამართლის რეფორმის სექტორული პოლიტიკის მხარდაჭერის პროგრამის“ ფარგლებში 18 მილიონ ევროს გამოუყოფს

ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრ გიორგი ბარამიძის პრესსამსახურის ინფორმაციით, ვიცე-პრემიერი გიორგი ბარამიძე სამუშაო ვიზიტით ბრიუსელში იმყოფება, სადაც გაფართოებისა და ევროპული სამეზობლო პოლიტიკის საკითხებში ევროკომისარ შტეფან ფულეს შეხვდა.

ოფიციალური შეხვედრის დასრულების შემდეგ საქართველოს მთავრობის სახელით გიორგი ბარამიძემ, როგორც ევროკავშირის დახმარებათა ეროვნულმა კოორდინატორმა, და ევროკომისარმა შტეფან ფულემ ხელი მოაწერეს ევროკავშირის დახმარების ეროვნული ინდიკატური პროგრამის 2011 წლის სამოქმედო გეგმით  გათვალისწინებული „სისხლის სამართლის რეფორმის სექტორული პოლიტიკის მხარდაჭერის პროგრამის“ საფინანსო შეთანხმებას. დოკუმენტი  საქართველოსთვის 18 მილიონი ევროს გამოყოფას ითვალისწინებს.

საფინანსო შეთანხმებით განსაზღვრული 18 მილიონი ევროდან 16 მილიონი ევრო პირდაპირ მიმართული იქნება სახელმწიფო ბიუჯეტში, რომელსაც საქართველო სამ ტრანშად მიიღებს, ხოლო 2 მილიონი ევრო მოხმარდება ტექნიკური დახმარების პროექტების განხორციელებას.

სახელმწიფო მინისტრის აპარატის ცნობით, პროექტი წარმოადგენს ამ სფეროში საქართველოსთვის დახმარების მეორე ფაზას, რომლის პირველი ეტაპი 2008 წლის სამოქმედო გეგმიდან 16 მილიონი ევროთი დაფინანსდა.

სისხლის სამართლის რეფორმის მხარდაჭერის პროგრამა ითვალისწინებს სისხლის სამართლის რეფორმის განხორციელებაზე პასუხისმგებელი უწყებათაშორისი საკოორდინაციო ჯგუფების შეხვედრების გაგრძელებას, რეფორმების მონიტორინგს, მიღწევათა შესახებ სტატისტიკის წარმოებას, შესაბამისი ანგარიშების მომზადებას და გამოქვეყნებას, გაერთიანებული ერების ორგანიზაციის კონვენციის შესაბამისად არასრულწლოვანთა მართლმსაჯულების რეფორმის დანერგვის პროცესის გაუმჯობესებას ბავშვთა უფლებების შესახებ.

რეფორმით, ასევე, გათვალისწინებულია პატიმართა უფლებების დაცვის მექანიზმების დახვეწა და სასჯელაღსრულების დაწესებულებებში პირობების გაუმჯობესება, პრობაციის სისტემის გაუმჯობესება, რეფორმების მონიტორინგის პროცესში სახალხო დამცველის აპარატის მაქსიმალური ჩართულობის უზრუნველყოფა.