თბილისი, 29 თებერვალი, საქინფორმი. გუშინ, 2012 წლის 28 თებერვალს, 20:00 საათზე, საქართველოს პრეზიდენტი მიხეილ სააკაშვილი საქართველოს პარლამენტში ყოველწლიური მოხსენებით გამოვიდა. სხვა მნიშვნელოვან საკითხებთან ერთად ის რუსეთ-საქართველოს ურთიერთობასაც შეეხო და ახალი ინიციატივით გამოვიდა, რომლის მიხედვითაც, რუსეთთან სავიზო რეჟიმი ცალმხრივად გაუქმდება.

„დაე, ყველა რუსმა ბიზნესმენმა იცოდეს, რომ შეუძლია საქართველოში ჩამოსვლა, ფულის ჩადება, ფულის გატანა, შემოტანა, ბიზნესის კეთება, წარმოების აწყობა, ხალხის დასაქმება და ის იქნება ისეთივე დაცული და შეეძლება თავისუფლად გადაადგილება, როგორც სხვა ნებისმიერი ქვეყნის წარმომადგენელს და მათთვის იქნება მაქსიმალურად ხელშემწყობი რეჟიმი შექმნილი“, – განაცხადა სააკაშვილმა.

მისივე თქმით, ყველა რუს მოქალაქეს შეუძლია შემოვიდეს საქართველოში, რომელიც თავისუფალია კორუფციისაგან, ძალადობისაგან, ადამიანის ღირსების შელახვისა და ბიუროკრატიული წნეხისაგან.