თბილისი, 20 თებერვალი, საქინფორმი. როგორც საზოგადოებრივი მოძრაობა "ქართული ოცნების" პრესსპიკერმა მაია ფანჯიკიძემ დღევანდელ ტრადიციულ ბრიფინგზე „სარწმუნო წყაროზე“ დაყრდნობით განაცხადა, „მიუნხენის უსაფრთხოების კონფერენციაზე მიწვეული ქართული დელეგაცია და, მათ შორის, პროსახელისუფლებო ექსპერტები, რუსეთის პრეზიდენტის ადმინისტრაციის ხელმძღვანელ სერგეი ივანოვს შეხვდნენ“.

„თედო ჯაფარიძის მთავარ კონსპირაციულ პარტნიორებად მონათლულ რუსეთის პრეზიდენტის ადმინისტრაციის ხელმძღვანელ სერგეი ივანოვსა და სხვებს მიუნხენშივე ქართული დელეგაცია, მათ შორის, პროსახელისუფლებო ექსპერტები შეხვდნენ. აღნიშნულ შეხვედრას ძალიან თბილ და მეგობრულ გარემოში ჩაუვლია. კარგია, თუ რუსეთთან დიალოგის აღდგენაზე მუშაობა ხდება, მაგრამ უკეთესი იქნება, რომ ამ ფორმატში პროსახელისუფლებო ექსპერტებთან ერთად მონაწილეობა საზოგადოების წარმომადგენლებსა და დამოუკიდებელ ექსპერტებსაც მიეღოთ. ასევე, კარგი იქნებოდა, რომ ამ შეხვედრის შემდეგ ქართველ საზოგადოებას გაეგო, რისთვის ტარდება ასეთი შეხვედრები, რა მიზნები აქვს მას და როგორია მათი შედეგი“, – განაცხადა ფანჯიკიძემ.