თბილისი, 18 თებერვალი, საქინფორმი. საქართველოს ეროვნული ბანკის მონეტარული პოლიტიკის კომიტეტმა მონეტარული პოლიტიკის განაკვეთი უცვლელად – 6.5 პროცენტზე, დატოვა.

წლიურმა ინფლაციამ იანვარში 0.5% შეადგინა, რაც 2009 წლის სექტემბრის შემდეგ ყველაზე დაბალი მაჩვენებელია. საქართველოს ეროვნულმა ბანკმა განაცხადა, რომ წლის მეორე ნახევრიდან ინფლაცია შესაძლოა, გაიზარდოს და 2012 წლის ბოლოსთვის საპროგნოზო მაჩვენებელს – 6 პროცენტს, მიაღწიოს.

მიუხედავად ინფლაციის დაბალი მაჩვენებლისა, წლის ბოლოს რეალური გაცვლითი კურსი გამყარდა, რაც „ხელს უწყობს სავაჭრო დეფიციტის გაზრდას, მეორე მხრივ, მოთხოვნის შესუსტებას განაპირობებს“, – განაცხადა ეროვნულმა ბანკმა.

გასული წლის მეოთხე კვარტალში მთლიანი შიდა პროდუქტის მოსალოდნელზე მაღალი ზრდის ტემპი დაფიქსირდა. შედეგად, წლიური ზრდის საპროგნოზო მაჩვენებლი 6.8 პროცენტს შეადგენს, ხოლო იანვარში გაიზარდა ფულადი გზავნილების შემოდინება – ამ მაჩვენებელმა 13.4 პროცენტით გადააჭარბა გასული წლის იანვრის მაჩვენებელს.

ეროვნული ბანკის განმარტებით, სწორედ ამ ფაქტორების გათვალისწინებით გადაწყვიტა მონეტარული პოლიტიკის კომიტეტმა განაკვეთის უცვლელად დატოვება.