თბილისი, 17 თებერვალი, საქინფორმი. სამხრეთ ოსეთის ტერიტორიაზე განთავსებული რუსეთის სამხედრო ბაზის შემადგენლობაში ახალი ბატალიონი იქმნება, რომელიც ადგილობრივი მოსახლეობით დაკომპლექტდება. ამის შესახებ ინფორმაციას საინფორმაციო სააგენტო „რესი“ ავრცელებს.

„რუსეთის სამხედრო ბაზამ უკვე გამოაცხადა, რომ იწყებს „ოსური ბატალიონის“ დაკომპლექტებას 35 წლამდე ასაკის ადგილობრივი მოსახლეობისგან, რომლებიც კონტრაქტის საფუძველზე იმსახურებენ და რომელთაც იგივე ხელფასები და პრივილეგიები ექნებათ, რაც რუს სამხედროებს“, – განაცხადა სამხრეთ ოსეთის თავდაცვის სამინისტროს წარმომადგენელმა გალინა გუჩმაზოვამ.

„ოსური ბატალიონი რუსეთის სამხედრო ბაზის შემადგენლობაში სამხრეთ ოსეთის რესპუბლიკისთვის პროფესიონალური სამხედრო კადრების სამჭედლო გახდება“, – აღნიშნა გუჩმაზოვამ.

საქართველოს საგარეო საქმეთა სამინისტროს მიერ 15 თებერვალს გავრცელებულ განცხადებაში აღნიშნულია, რომ ეს ქმედება რუსეთის მიერ საქართველოს ოკუპირებული ტერიტორიების „მილიტარიზაციის“ ნაწილია.