თბილისი, 14 თებერვალი, საქინფორმი. „ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ნიუ-დელიში ისრაელის საელჩოს მანქანის აფეთქებისა და თბილისში ისრაელის საელჩოს თანამშრომლის მანქანის აფეთქების მცდელობის უკან ირანი დგას“, – იტყობინებიან „როიტერი“ და „Associated Press“.

საქართველოს შინაგან საქმეთა სამინისტროს ინფორმაციით, თბილისში ისრაელის საელჩოს თანამშრომელი პოლიციას დაუკავშირდა მას შემდეგ, რაც 13 თებერვალს საკუთარ მანქანაში ასაფეთქებელი მოწყობლობა აღმოაჩინა. შსს-ის თქმით,  მოწყობილობა აფეთქებამდე იქნა გაუვნებელყოფილი. ასევე, 13 თებერვალს ნიუ- დელიში ისრაელის საელჩოს მანქანის აფეთქების შედეგად ოთხი ადამიანი დაშავდა.

„დღეს ჩვენ უდანაშაულო მოქალაქეების წინააღმდეგ ორი ტერორისტული მცდელობის მოწმენი გავხდით, – განაცხადა ნეთანიაჰუმ პოლიტიკოსებთან შეხვედრაზე. – ამ თავდასხმების უკან ირანი დგას და ის მსოფლიოში ტერორიზმის უმსხვილესი ექსპორტიორია“.

მან, ასევე, განაცხადა, რომ ისრაელმა ბოლო თვეებში ანალოგიური თავდასხმები აზერბაიჯანსა და ტაილანდში აღკვეთა.

13 თებერვალს ნიუ-დელიში მომხდარ აფეთქებაზე და თბილისში აფეთქების მცდელობაზე პასუხისმგებლობა ჯერ არავის აუღია.

„ჩვენი სამართალდამცავები ამ თემაზე მუშაობენ; იმედია, არავის არ გაქვთ ეჭვი იმაში, რამდენად ეფექტურად მუშაობენ ჩვენი სამართალდამცავები. როგორც კი გამოძიება დამთავრდება, საზოგადოებას იმ წამსვე მიაწვდიან კომენტარებს“, – განუცხადა ჟურნალისტებს საქართველოს საგარეო საქმეთა მინისტრმა გრიგოლ ვაშაძემ.

ინციდენტებს ერთი დღით ადრე წინ უძღოდა ჰეზბოლას ლიდერის მოადგილის, იმად მუღნიას, მკვლელობის ოთხი წლისთავი; მის მკვლელობას ისლამისტები ისრაელს აბრალებენ.