თბილისი, 6 თებერვალი, საქინფორმი. ამის შესახებ ჟურნალისტებს „ფორუმის“ ლიდერმა კახა შარტავამ ბიძინა ივანიშვილთან გამართული დღევანდელი შეხვედრის შემდეგ განუცხადა, რომლის ინფორმაციით, ახალ კოალიციას აქვს სურვილი, „ეროვნული ფორუმი“, როგორც პოლიტიკური სუბიექტი, მას შეუერთდეს.

„ჩვენი მხრიდანაც არის პოზიტიური განწყობა და შევთანხმდით, რომ „ეროვნული ფორუმი“ ახალი კოალიციის წევრი გახდება. ამ საკითხს ჩვენს აქტივს გავაცნობთ, თუმცა, წინასწარი მონაცემებით, დადებითად იქნება აღქმული. დანარჩენი საკითხები, კოალიციის ფორმირების წესი და სხვა დეტალები უახლოეს ხანში გახდება ცნობილი და გამოცხადდება“, – განაცხადა შარტავამ.

ამასთან, შარტავას ინფორმაციით, ბიძინა ივანიშვილის პარტიისა და ახალი კოალიციის ფორმირება, სავარაუდოდ, თებერვალში მოხდება.

დღევანდელი შეხვედრით, რომელიც ივანიშვილის მთაწმინდაზე მდებარე რეზიდენციაში გაიმართა, „ეროვნული ფორუმის“ ლიდერი კმაყოფილია. შარტავას განცხადებით, კონსულტაციებმა მეგობრულ გარემოში ჩაიარა.