თბილისი, 1 თებერვალი, საქინფორმი. მკითხველებმა, ალბათ, შენიშნეს, რომ საქინფორმის მთავარ გვერდზე www.saqinform.ge ჩვენი საინფორმაციო პარტნიორების ორი ახალი ბანერი გამოჩნდა – საქართველოს ხსნის საერთაშორისო კავშირი „ნათლის მხედრის“ და ახლახან შექმნილი პირველი ქართულენოვანი ინტერნეტრადიო „გრემის“ ბანერი. ორივე ორგანიზაცია რეგისტრირებულია დიდ ბრიტანეთში და მათი მთავარი ოფისები მდებარეობს ლონდონში. მათი დამფუძნებელი და ხელმძღვანელი არის საქართველოს საერთაშორისო ხსნის კავშირი „ნათლის მხედრის“ გენერალური მდივანი, ქალბატობი ჯულიანა დიუმა. ქალბატონი ჯულიანა დიუმა, აგრეთვე, არის საქინფორმის წარმომადგენლობის ხელმძღვანელი ლონდონში.

ჩვენი მკითხველებისთვის, და არა მარტო მათთვის, კარგადაა ცნობილი ეს სახელი – ქალბატონმა ჯულიანამ საინფორმაციო-ანალიტიკურ სააგენტო „საქინფორმს“ აღორძინების პირველი დღეებიდანვე აღმოუჩინა ყველანაირი – მორალური და საინფორმაციო, მხარდაჭერა. მისი მოღვაწეობა, როგორც სამართალდამცველის, კარგადაა ცნობილი ევროკავშირის ქვეყნებშიც და საქართველოშიც. სიყვარული და ერთგულება მისი ისტორიული სამშობლოს – საქართველოს, მიმართ, ტკივილი ქვეყნისა და მთელი ქართველი ხალხის ბედზე, აქტიური ცხოვრებისეული პოზიცია და პროფესიონალიზმი – ამ თვისებებმა მას დამსახურებული ავტორიტეტი მოუპოვეს როგორც მეგობრებსა და ახლობლებს, ისე თანამშრომლებსა და მკითხველებს შორის.