თბილისი, 31 იანვარი, საქინფორმი. „თავისუფალი პრესის მხარდაჭერის ორგანიზაციამ“  2011 წლის დეკემბერში აამოქმედა თავისი პირველი პროექტი – „თბილისის მოსახლეობისთვის თავისუფალი პრესის ხელმისაწვდომობის ხელშეწყობა“.

როგორც საქინფორმს ორგანიზაციიდან აცნობეს, ამ ეტაპზე ორგანიზაციის დამფინანსებლები არიან:

საერთაშორისო საქველმოქმედო ფონდი „ქართუ“ – 131070 ლარი (გრანტი);

გაზეთი „კვირის პალიტრა“ – 2000 ლარი (შემოწირულობა);

გაზეთი „ახალი თაობა“ – 500 ლარი (შემოწირულობა);

მოქალაქეთა შემოწირულობები – 120 ლარი.

„ფონდი „ქართუს“ გრანტით დაფინანსდა პროექტის პირველი ეტაპი,  კერძოდ – ორგანიზაციის მატერიალურ-ტექნიკური ბაზით უზრუნველყოფა, რაც ითვალისწინებდა სათავო ოფისისა და ლოგისტიკის ცენტრებისათვის ფართის დაქირავებას; ოფისების აღჭურვას მათი ნორმალური ფუნქციონირებისათვის აუცილებელი კომპიუტერული ტექნიკითა და საოფისე ავეჯით; ორი ავტომანქანის შეძენას – ლოგისტიკის ცენტრებისა და სათავო ოფისისთვის; პრესის რეალიზაციისათვის აუცილებელი მოძრავი სტენდი-ურიკების, სტაციონარული სტენდებისა და სტენდი-ველოსიპედების შეძენას; სპეციალური ქურთუკებისა და ქუდების შეძენას პრესის რეალიზატორებისათვის; თანამშრომლების შერჩევასა და მათთვის ტრენინგების ჩატარებას. დღეის მდგომარეობით, თბილისის ქუჩებში უკვე 30 სტენდი-ურიკა მოძრაობს“, – აცხადებენ ორგანიზაციაში.