თბილისი, 25 იანვარი, საქინფორმი. როგორც საქინფორმმა უკვე დაწერა, ავღანეთში „ISAF“-ის ოპერაციაში მონაწილეობა ქართველი სამხედროებისთვის შესაძლოა, სავალდებულო გახდეს (იხ. „ავღანეთში სამსახური ქართველი სამხედროებისთვის სავალდებულო ხდება?!“ როგორც სააგენტოს ინფორმირებულმა ინკოგნიტო წყარომ აცნობა, ქართველ სამხედროებს ავღანეთში წასვლას აიძულებენ და შესაძლოა, თავდაცვის მინისტრ ბაჩო ახალაიას სპეციალური ბრძანებაც კი გამოიცეს, რომელიც სამხედროებს „ISAF“-ის ოპერაციაში მონაწილეობას ოფიციალურად დაავალდებულებს.

ჩვენ ამ ინფორმაციით გადამოწმებას სხვადასხვა წყაროსთან შევეცადეთ და ოდნავ განსხვავებული, თუმცა მეტად ყურადსაღები და, შეიძლება ითქვას, საგანგაშო ინფორმაცია შევიტყვეთ. საქმე ისაა, რომ საქინფორმის  წყაროების ინფორმაციით, მინისტრის ბრძანების გამოცემა არ იგეგმება, თუმცა კონტრაქტით მომუშავე სამხედროებზე თავდაცვის სამინისტროს მხრიდან მორალურ და ფსიქოლოგიურ ზეწოლას აქვს ადგილი.

„ყველას იბარებენ და არჩევანის წინაშე აყენებენ. მოთხოვნა ასეთია: ან წავლენ ავღანეთში, ან პატაკი უნდა დაწერონ, რა შემთხვევაშიც ჯარისკაცი კონტრაქტს არღვევს და ჯარიმის სახით 28 ათასი ლარი უნდა გადაიხადოს. როგორც ვიცი, ერთ-ერთი ასეთი შემთხვევის დროს სამხედროებს, რომელთაც წასვლაზე უარი თქვეს, პატაკი ძალით დააწერინეს, შემდეგ კი ისინი მთელი დღე-ღამის განმავლობაში გამოკეტეს, აშიმშილეს და მხოლოდ მეორე დღეს გაუშვეს სახლებში. ამ ადამიანებს უკვე ეკისრებათ ჯარიმის გადახდა. იყო კიდევ ერთი შემთხვევა. კერძოდ, 21 წლის ბიჭმა, იმ მიზეზით, რომ დედა ავადმყოფი ჰყავს და მის მეტი ვერავინ მოუვლის, წასვლაზე უარი თქვა და სთხოვა ხელმძღვანელობას, არ დაევალდებულებინათ, თუმცა მათი მხრიდან პასუხად ლანძღვა-გინება მიიღო – „მიგვიფურთხებია, დედა გყავს ავად თუ რა პრობლემა გაქვს“... მოკლედ, კონტრაქტზე მყოფ სამხედროებს აშანტაჟებენ და ავღანეთში წასვლას აიძულებენ“, – ამბობს ინფორმირებული ინკოგნიტო წყარო.