თბილისი, 23 იანვარი, საქინფორმი. „თავისუფალი პრესის მხარდაჭერის ორგანიზაციის“ პროექტის – „თბილისის მოსახლეობისთვის თავისუფალი პრესის ხელმისაწვდომობის ხელშეწყობა“ – ფარგლებში, საქართველოს დედაქალაქში უკვე პრესის რეალიზაციის 25 ურიკა-სტენდი მოძრაობს.  მოძრავი ურიკა-სტენდები „თავისუფალი პრესის მხარდაჭერის ორგანიზაციამ“ სპეციალურად დაამზადებინა. ეს ორგანიზაციის მიერ საზოგადოებისთვის შეთავაზებული ერთ-ერთი სიახლეა.

ბეჭდური მედიის რეალიზატორებს, რომლებიც მოძრავ ურიკა-სტენდებზე მუშაობენ, აცვიათ სამუშაო ქურთუკები და კეპები წარწერით – „მე მიყვარს თავისუფალი პრესა“. ასეთი სამოსი „თავისუფალი პრესის მხარდაჭერის ორგანიზაციამ“ პრესის რეალიზატორებისთვის სპეციალურად დაამზადებინა. აღსანიშნავია, რომ ორგანიზაციამ ეს სამუშაო ფორმა პრესის სხვა 60-მდე რეალიზატორსაც უსასყიდლოდ დაურიგა.

„ჩვენ განზრახული გვაქვს, ჟურნალ-გაზეთები თბილისის ყველაზე განაპირა რაიონებსაც მივაწოდოთ, შესაბამისად, პრესის 200 რეალიზატორის დასაქმებას ვაპირებთ, – აცხადებს „თავისუფალი პრესის მხარდაჭერის ორგანიზაციის“ აღმასრულებელი დირექტორი ლექსო ჯიქია, – ამ საკითხთან დაკავშირებით, მსურველებს დღესაც შეუძლიათ მოგვმართონ“.