ბიძინა ივანიშვილის ახლადშექმნილ პოლიტიკურ მოძრაობას ცნობილი სახეები უკვე ტოვებენ. მართალია, ივანიშვილი დაჟინებით ამტკიცებს, ჩემზე ზეგავლენის მოხდენა ადვილი არ არისო, თუმცა ძალიან აშკარაა, რომ მის პოლიტიკურ მოძრაობას "რესპუბლიკელები" წამოასხდნენ თავზე.

ჯერჯერობით, ივანიშვილი ქართულ პოლიტიკაში "რესპუბლიკელებისა" და რამდენიმე ურეიტინგო პარტიის ოცნების ახდენას ახერხებს ჩარიცხული მილიონებით. ჟურნალისტების ნაწილსაც ჰპირდებოდა იგი ოცნებების ახდენას, მაგრამ როგორც აღმოჩნდა, დაპირებული სამმაგი ხელფასის ნაცვლად, მათ ზუსტად იგივე ხელფასი შესთავაზეს, რასაც ძველ სამსახურებში იღებდნენ.

რა ხდება ივანიშვილის "ქართულ ოცნებაში" და რატომ დატოვა იგი ყოფილმა სახალხო დამცველმა, ნანა დევდარიანმა ხუთდღიანი მუშაობის შემდეგ, ამაზე "პრესა.ჯი" ნანა დევდარიანს ესაუბრა.

- ქალბატონო ნანა, რატომ დატოვეთ "ქართული ოცნება"?

- მიმაჩნია, რომ სხვა ტაქტიკით და სტრატეგიით არის საჭირო მოქმედება. ახალი არაფერია იმაში, თუ გეტყვით, რომ საზოგადოების დიდი ნაწილისთვის "რესპუბლიკელები" ივანიშვილისთვის მისასალმებელი პარტნიორები არ არიან, თუმცა საზოგადობამ ისინი მიიღო ივანიშვილის ხათრით. როგორ აშენდება ივანიშვილის პარტია დიდწილად არის დამოკიდებული მისი პოლიტიკური პერტნიორების ხელშეწყობაზე. ანუ იმაზე, მისი პოლიტიკური პარტნიორები შეუწყობენ ამაში ხელს, თუ შეუშლიან. მე დავინახე პრობლემები იქ და ამიტომ ვარჩიე წამოსვლა.

- ანუ ივანიშვილზე "რესპუბლიკელებს" დიდი გავლენა აქვთ?

- თვითონ უარყოფს, რომ მასზე რაიმენაირი ზეგავლენის მოხდენა შეიძლება. საგანგებგოდ თქვა ჟურნალისტებთან: მე ის კაცი არა ვარ, ვიზეც ზეგავლენას მოახდენენო, მაგრამ პარტიის მშენებლობა ზედა რგოლში არ ხდება, ხდება ქვემოთ, ეს ზემოქმედება კი ქვედა რგოლში საკმაოდ საგრძნობია. შეიძლება თავად ივანიშვილს არ კარნახობენ როგორ მოიქცეს და რა თქვას, მაგრამ ქვედა რგოლებში აშკარად ჩანს, რომ ეს ზეგავლენა არსებობს.

- მუსირებს აზრი, რომ ივანიშვილი ძალიან ადვილად "ჰყვება ენებს". თქვენ წერილში ახსენეთ, რომ მას უთხრეს, თითქოს არჩევნებზე, როდესაც თქვენ საარჩევნო კომისიის თავმჯდომარე იყავით, ფინანსურ გარიგებებს ჰქონდა ადგილი...

- მასთან პირადად არ მისაუბრია და არ ვიცი, რა რეაქცია ჰქონდა ამაზე, მაგრამ თბილისში ხომ არაფერი იმალება, ჩემამდე მოვიდა ეს ინფორმაცია. ჩემთვის ის კი არ არის მნიშვნელოვანი, რომ ვიღაცამ ეს თქვა, თუ მან დაიჯერა, ეს უკვე ძალიან ცუდი სიგნალია. იმიტომ, რომ ლოგიკას უნდა მოუხმო ასეთ დროს ადამიანმა. მე რომ ფულის ამღები ვყოფილიყავი, აქამდე მილიონჯერ გამჟღავნდებოდა ეს, 8 წელი გავიდა მას შემდეგ. კაპიკიც რომ მქონოდა აღებული, ვინ მაპატიებდა ამას? თუ ეს ივანიშვილმა დაიჯერა, ნიშნავს, რომ მასზე მართლაც ძალიან ადვილი ყოფილა ზეგავლენის მოხდენა.

- როცა მიდიოდით "ქართულ ოცნებაში", რა შეხედულებები გქონდათ ამ მოძრაობაზე?

- ერთ-ერთ ჩემს სტატიაზე, კომენატარის სახით ვიღაცამ დაწერა: 2003-ში უნდა დაგემტკიცებინათ ეს და ახლა თქვენი პოლიტიკური რეაბილიტაცია ვერ მოხდებაო. მე "ქართულ ოცნებაში" პოლიტიკური რეაბილიტაციისთვის არ მივსულვარ, ამის სურვილი რომ მქონოდა, 8 წლის განმავლობაში არაერთი შემოთავაზება მქონდა პოლიტიკური პარტიებისგან. "ქართულ ოცნებაში" მივედი მხოლოდ იმიტომ, რომ პარტიულ მშენებლობაში ჩემი გამოცდილებით დავხმარებოდი, მაგრამ დავინახე, რომ ეს არ ყოფილა საჭირო, რადგან სხვანაირად ხედავენ ამ პროცესს და რა აზრი ჰქონდა ჩემს იქ დარჩენას?

- არ ვგულისხმობ პოლიტიკურ რეაბილიტაციას, გქონდათ იმედი, რომ ივანიშვილი ქმნიდა დემოკრატიულ მოძრაობას?

- ახლაც არ ვკარგავ ამის იმედს. ეს პოლიტიკური პროცესია. მე იქ ვიქნები თუ არა, ამას გადამწყვეტი მნიშვნელობა არ აქვს, მთავარია ყველაფერი გაკეთდეს სწორად, ისე, როგორც ქართველ ამომრჩეველს სურს.

- რაც შეეხება ფულს, რომელსაც მრავლად არიგებს ივანიშვილი პარტიებსა თუ მედია-საშუალებებში, რამდენად სწორად მიგაჩნიათ მილიონობით ლარის მათ ანგარიშებზე ჩარიცხვა?

- მე მიმუშავია თითქმის უფინანსობის პირობებშიც და ნორმალური დაფინანსებითაც. ამ პოლიტიკურ გაერთიანებას ფინანსების პრობლემა არ აქვს, მაგრამ ფული არ იგებს არჩევნებს. არჩევნებს იგებს ძალიან სწორად დაგეგმილი საარჩევნო სტრატეგია, ტაქტიკა და სწორად აშენებული პარტიული სტრუქტურები. ფული არის ამაზე ზედნაშენი, იმის საშუალება, რომ ეს სტრუქტურები ეფექტურად ამუშაო. ჩემთვის წამოსვლის შესახებ გადაწყვეტილება იოლად მისაღები იყო, რადგან არასდროს კაპიკი არ მიმიღია ბიძინა ივანიშვილისგან არც დახმარების, არც სტიპენდიის და არც ხელფასის სახით. არ არის მნიშვნელოვანი, ვიღაცამ თავისი ფული ვის მისცა, მთავარია აქედან რა რეზულტატი იქნება მიღებული, ეს იქნება შედეგიანი, თუ არა.

- როგორ შეაფასებთ ივანიშვილის სამთვიან მოღვაწეობას პოლიტიკაში?

- მე ვთვლი, რომ პირველი ერთი თვის აქტივობების შემდეგ, ბოლო ორი თვის აქტივობა აშკარად ნაკლებია, თუმცა თვითონ ამბობს, რომ ახლა დაიწყება შეხვედრები, რასაც მე ჯერჯერობით ვერ ვხედავ. ვერ ვხედავ, რომ ეს არის დაგეგმილი პროცესი. ჩვენი ხელისუფლება ბევრ საბაბს იძლევა კრიტიკისათვის, სათანადო კრიტიკას კი ივანიშვილისგან ვერ ვისმენ. ობიექტურ კრიტიკას ვგულისხმობ, ჩასაფრებულს და გამოგონილს არა.

- რამდენად სწორად მიიჩნევთ, მისი მხრიდან მეუღლის, შვილების ასეთი სახით პოლიტიკურ პროცესებში ჩართვას, მით უმეტეს, რომ მათ ამის გამოცდილება არ აქვთ?

- რა თქმა უნდა, ეს ნორმალური ვითარებისთვის შესაფერისი არ არის, მაგრამ ყველას კარგად ესმის, რომ ეკა ხვედელიძის პოლიტიკაში ჩართვა, იძულებითი ნაბიჯია.

- მის გარშემო უამრავი პოლიტიკური ფიგურაა, პარტიის მეუღლისთვის ჩაბარება მათთვის უნდობლობის გამოცხადებაზე ხომ არ მიუთითებს?

- არა, სწორედ ეს არის ის, რაშიც სრულად ვეთანხმები ივანიშვილს. მე "ქართული ოცნებიდან" წამოვედი იმის გამო, რომ სხვა ლიდერები უფრო მეტს აქტიურობდნენ მისი პარტიის ჩამოყალიბების პროცესში. როცა კაცი ქმნის თავის პარტიას, სხვა პარტიის ლიდერი არ უნდა ჩაუყენოს სათავეში მას. ვინაიდან ივანიშვილს ჯერჯერობით გამოკვეთილი პარტიული ბირთვი არ ჰყავს, ეს იძულებით მიღებული გადაწყვეტილება იყო.

- ივანიშვილი ამბობს, რომ მისი ტელევიზია იქნება აბსოლუტურად ობიექტური, რამდენად გჯერათ, რომ ის ივანიშვილის ინტერესებს არ გაატარებს? ასევე, თქვენ თქვით, რომ ჟურნალისტებს, რომლებსაც სამმაგ ხელფასს ჰპირდებოდა, მან იგივე ანაზღაურება შესთავაზა, როგორსაც დღეს არცთუ მდიდარ მედია-საშუალებებში მომუშავე ჟურნალისტები იღებენ.

- ასე ამბობენ, ვნახოთ. ჯერჯერობით საცდელი გადაცემებიც არ არის გაშვებული. ობიექტურობის რა გითხრათ, ივანიშვილის ტელევიზია ობიექტური ვერ იქნება, თუნდაც იმიტომ, რომ ის იძულებული გახდება ყველა ბრალდებაზე პასუხი გასცეს. კითხვა-პასუხის რეჟიმი კი ობიექტური ინფორმაციის მიწოდებას გამორიცხავს.

- რაც შეეხება "ქართულ ოცნებაში" არსებულ მდგომარეობას, რამდენიმე დღის წინ, ექსპერტმა ვაჟა ბერიძემ დატოვა მოძრაობა, ვრცელდებოდა ინფორმაცია რომ ეკა ბესელიასაც ჰქონდა პრობლემები ივანიშვილთან, რამდენად ჯანსაღი ურთიერთობებია ამ გაერთიანებაში?

- ვინაიდან მე ივანიშვილს არცერთხელ არ შევხვედრივარ, მის სახლში ნამყოფი არ ვარ და იქაური ვითარება არ ვიცი, ვერაფერს გეტყვით, შემიძლია მხოლოდ იმაზე ვისაუბრო, სადაც მე ვიყავი, და რაც არ მომეწონა უკვე გითხარით. არაფერი იმალება, თუ არაჯანსაღი პროცესია ეს აუცილებლად გამოვა გარეთ, თუ ჯანსაღია - დალაგდება.

- სამთვიანი მოღვაწეობის პერიოდში, ასეთ მოკლე დროში, თუნდაც ორი ადამიანის მიერ მოძრაობის დატოვება, არ მიანიშნებს რომ არაჯანსაღი სიტუაციაა და ეს გაერთიანება დიდხანს ვერ გასტანს?

- არასდროს მქონდა საკუთარ თავზე გადაჭარბებული შეხედულება. და ვერ ვიტყვი, რომ რადგან მე წამოვედი ე.ი. იქ ცუდია, მაგრამ სადაც ვიღაც თავს უფლებას აძლევს და ამბობს: რეზო ამაშუკელი აქ არ გვინდა, იმიტომ, რომ სომხების ხმებს დაგვაკარგინებსო, ჩემთვის ეს უკვე სიგნალია. ის, რომ ვიღაც წყვეტს, ვინ უნდა და ვინ არ უნდა ბიძინა ივანიშვილის გვერდით დაინახოს, არ არის სწორი.

- როგორც ვხვდები კვლავ "რესპუბლიკელების" გავლენაზეა საუბარი, როგორ ახერხებს პარტია, რომელსაც აქვს ნულოვანი რეიტინგი, ივანიშვილის ასეთი გავლენის ქვეშ მოქცევას?

- ნულოვანი რეიტინგი არ აქვს, თავიანთ ორ-სამ პროცენტს ნუ დავუკარგავთ. "რესპუბლიკელები" საკუთარ თავს ყოველთვის მიიჩნევენ ინტელექტუალთა პარტიად, მაგრამ მოგეხსენებათ, ამომრჩევლის ნდობის გარეშე ვერანაირი ინტელექტუალური ჯგუფი საზოგადოებრივ ცხოვრებაზე ზეგავლენას ვერ მოახდენს. თუმცა ჩვენს ხელისუფლებაშიც არის ულტრალიბერალური ჯგუფი (თავისუფლების ინსტიტუტი), ისიც უმცირესობაა, მაგრამ ახერხებს უმრავლესობას თავს მოახვიოს თავისი აზრი. ეს ერთი და იგივე ფენომენია.

- რადგან ინტელექტუალობასა და განათლებას შევეხეთ, გკითხავთ, თავისი სატელევიზიო გამოსვლებით ივანიშვილი და მისი მეუღლე დიდად განათლებული ადამიანების შთაბეჭდილებას არ ტოვებენ, თქვენ რა წარმოდგენა გაქვთ მათზე?

- განათლება ჩვენთან ცოტა ცალმხრივად ესმით. ადამიანი, რომელიც ბევრ წიგნს წაიკითხავს განათლებული არ არის, ის არის ნაკითხი. მე უკვე 8 წელია ქალაქში აღარ ვცხოვრობ და უამრავი ადამიანი ვნახე, რომელსაც შეიძლება სულ ორი წიგნი აქვს წაკითხული, მაგრამ არის განათლებული. განათლებული მოდის სიტყვა ნათელისგან, ანუ რამდენად ნათელს ხარ ზიარებული. მე ნაკითხობას ვერ შევუმოწმებ ბიძინა ივანიშვილს, რადგან არ მისაუბრია მასთან და არ ვიცი რამდენად ღრმად ნაკითხია, მაგრამ მას სხვა ტიპის განათლება აქვს და ალბათ ადამიანურ ურთიერთობებში, ცხოვრებისეულ სიტუაციებში ბევრად უკეთ არის ჩახედული, ვიდრე რომელიმე ნაკითხი "რესპუბლიკელი".

სოფო ედიბერიძე