თბილისი, 20 იანვარი, საქინფორმი. როგორც რუსეთის საგარეო საქმეთა მინისტრმა სერგეი ლავროვმა სამინისტროში გამართულ პრესკონფერენციაზე საქართველოსთან დაკავშირებით ჟურნალისტების მიერ დასმული კითხვების საპასუხოდ განაცხადა, „რუსეთზე რომ იყოს დამოკიდებული, საქართველოსთან ურთიერთობის მრავალი მიმართულებით განვითარებაში არანაირი წინააღმდეგობა არ იარსებებდა“.

„ჩვენ არაერთხელ განვმარტეთ მიზეზები, რომელთა გამოც მიხეილ სააკაშვილთან ჩვენი ურთიერთობა შეუძლებელია. ვფიქრობ, ეს მიზეზები ყველას ესმის და ამაზე დეტალურად აღარ შევჩერდები. ჩვენი კავშირების გაფართოებისადმი ინტერესის გამოვლინებას რთულ სიტუაციაშიც კი, როდესაც საქართველოს ინიციატივით 2008 წელს დიპლომატიური ურთიერთობები შეწყდა, ყოველთვის კონსტრუქციული რეაქცია ხვდება“, – განაცხადა ლავროვმა.

მისივე თქმით, „ურთიერთობები მრავალი მიმართულებით ვითარდება და მათ არ სურთ, რაიმე სახის სირთულეები შექმნან ორი ქვეყნის მოქალაქეების ურთიერთობებში“.

„ძალიან ბევრი კეთდება ჰუმანიტარულ სფეროში. კერძოდ, თეატრის მოღვაწეები, მსახიობები და რეჟისორები სტრუმრობენ ერთმანეთს, დგამენ სპექტაკლებს და თამაშობენ. ჩვენ ამას ყველანაირად ვუწყობთ ხელს. ყველაზე კონსტრუქციული რეაქციით ხვდებიან ჰუმანიტარულ შემთხვევებს, როდესაც საუბარია ნათესავების მონახულებაზე, ქორწილებზე. ვაჭრობის სფეროში აუცილებელია, უფრო აქტიურად დავკავდეთ პარტნიორების ძებნით, რათა ქართული პროდუქცია იყიდებოდეს რუსეთში, რუსული კი, შესაბამისად, საქართველოში. შეუძლებელი არაფერია“, – აღნიშნა ლავროვმა.

ამასთან, მინისტრი მიიჩნევს, რომ სააკაშვილის ნებისმიერი განცხადება მათ ჩიხში აქცევს.