თბილისი, 20 იანვარი, საქინფორმი. რუსეთის პრემიერ-მინისტრმა ვლადიმერ პუტინმა რუსეთის ტელერადიოკომპანიებისა და ბეჭდური მედიის ხელმძღვანელებსა და მთავარ რედაქტორებთან შეხვედრისას სხვა თემებთან ერთად 2008 წლის აგვისტოს ომიც გაიხსენა და ამ საკითხთან შეხებისას მწერალ ბორის აკუნინზე ისაუბრა, რომელთან შეხვედრის სურვილიც გამოთქვა.

„ადამიანები სხვადასხვა მოსაზრებით მოქმედებენ. მაგალითად, ჩვენ ყველას გვიყვარს მწერალი აკუნინი. ის ძალიან საინტერესოდ წერს, ყოველ შემთხვევაში – ჩემთვის, მე ხომ რუსეთის ისტორია მიყვარს. ის, რამდენადაც ჩემთვისაა ცნობილი, ეთნიკური ქართველია. მე მესმის, რომ კავკასიის ცნობილი კრიზისის დროს მას შეეძლო, რუსეთის ქმედებები არ აღექვა. იქ ჩვენი ადამიანების მნიშვნელოვანი რაოდენობა მოკლეს. დარწმუნებული ვარ, თავად საქართველოში მცხოვრები ქართველების მნიშვნელოვან ნაწილს ჩვენი ქმედებების მოტივები ესმის. რა უნდა გაგვეკეთებინა?! ჩვენ ხომ არ დაგვირღვევია საერთაშორისო სამართლებრივ დოკუმენტებში დაფიქსირებული შეთანხმება?! – ეს ერთი. მეორეც, მე ეჭვიც არ მქონია, რომ ჩვენ ამ მხარეს შევტრიალდებოდით, თუმცა თქვენ იცით, მუდმივად არსებობს აშშ-ის რაკეტსაწინააღმდეგო თავდაცვის სისტემასთან დაკავშირებული პრობლემა: ის მუდმივად დღის წესრიგშია“, – განაცხადა პუტინმა.

რუსეთის პრემიერის ამ განცხადების შემდეგ მწერლებმა ბორის აკუნინმა და დიმიტრი ბიკოვმა მასთან შეხვედრის მზადყოფნა გამოთქვეს. „თუ ვლადიმერ პუტინს შეხვედრა და საქმეზე საუბარი სურს, თუ ის მზადაა, სერიოზული მკაცრი საუბრისთვის, ვერანაირ პრობლემას ვერ ვხედავ. სიამოვნებით ვეტყვი ყველაფერს ქვეყანაში შექმნილ სიტუაციასთან დაკავშირებით“, – განაცხადა რადიო „ეხო მოსკვის“ ეთერში აკუნინმა.

მისივე თქმით, „იქიდან გამომდინარე, რომ იგი ამომრჩეველთა ლიგის წევრია, შეხვედრის საკითხი მეგობრებთან უნდა განიხილოს“.