თბილისი, 20 იანვარი, საქინფორმი. „ის საერთაშორისო ორგანიზაციები, რომლებიც აფხაზეთის მოქალაქეებს საზღვარგარეთ გასამგზავრებლად ე.წ. ნეიტრალურ პასპორტებს შესთავაზებენ, აფხაზეთს დატოვებენ“, – განაცხადა აფხაზეთის  ლიდერმა ალექსანდრე ანქვაბმა აფხაზეთის საგარეო საქმეთა სამინისტროს ხელმძღვანელობასთან სოხუმში გამართულ პრესკონფერენციაზე.

აფხაზური მხარის ინფორმაციით, ამ შეხვედრაზე აფხაზეთში მოქმედი საერთაშორისო ორგანიზაციების საქმიანობა განიხილებოდა. „აფხაზეთის საგარეო საქმეთა სამინისტროს ინფორმაციით, ზოგმა ასეთმა ორგანიზაციამ, შესაძლოა, აფხაზეთის მოქალაქეებს მათ მიერ დაფინანსებულ პროექტებში მონაწილეობის მისაღებად და ევროპის ქვეყნებში გასამგზავრებლად საქართველოში დამზადებული აფხაზეთისა და სამხრეთ ოსეთის მოქალაქეებისათვის განკუთვნილი ე.წ. ნეიტრალური პასპორტები შესთავაზონ. ეს, უპირველეს ყოვლისა, ახალგაზრდების გამგზავრებას ეხება“, – იუწყება აფხაზური მხარე და აღნიშნავს, რომ ამ ინფორმაციის გაგების შემდეგ ალექსანდრე ანქვაბმა გასცა განკარგულება, რომლის მიხედვითაც, ასეთი საერთაშორისო ორგანიზაციები აფხაზეთის ტერიტორიას დატოვებენ.