თბილისი, 18 იანვარი, საქინფორმი. როგორც თეთრი სახლის ოფიციალური ვებგვერდი იუწყება, აშშ-ის პრეზიდენტი ბარაკ ობამა საქართველოს პრეზიდენტ მიხეილ სააკაშვილს მიმდინარე წლის 30 იანვარს თეთრი სახლის ოვალურ კაბინეტში პირისპირ შეხვდება. საქართველოს პრეზიდენტი ერთ-ერთი პირველი აღმოჩნდა იმ სიაში, ვისთან შეხვედრასაც ობამა წლის განმავლობაში გეგმავს.

„მიმდინარე წელს შეერთებულ შტატებსა და საქართველოს შორის დიპლომატიური ურთიერთობების დამყარების 20 წლისთავი აღინიშნება და ორი ქვეყნის პრეზიდენტები ამერიკასა და საქართველოს შორის ურთიერთობების კიდევ უფრო გაღრმავებაზე ისაუბრებენ. ისინი სტრატეგიული პარტნიორობის შესახებ შეთანხმების ფარგლებში ტურიზმის, ვაჭრობის, ენერგეტიკის, მეცნიერების, განათლების, კულტურისა და უსაფრთხოების საკითხებს განიხილავენ“, – ნათქვამია თეთრი სახლის განცხადებაში.