თბილისი, 12 იანვარი, საქინფორმი. საზოგადოებრივი მაუწყებლის სამეურვეო საბჭოს თავმჯდომარე ლევან გახელაძის განცხადებით, ქუთაისში ქვეყნის პარლამენტის გადატანამ, რაც, სავარაუდოდ, ოქტომბერ-ნოემბერში უნდა დასრულდეს, სერიოზული ცვლილებები გამოიწვია. „საჭიროა ოფისის მოწყობა, ტექნიკური აღჭურვა. ბიუჯეტში ამისთვის, დაახლოებით, 7 მილიონი ლარია გამოყოფილი. მოგეხსენებათ, მეორე არხის მაუწყებლობის ერთ-ერთი მთავარი შემადგენელი ნაწილი პარლამენტის პლენარული და საკომიტეტო სხდომების გადაცემაა“, – ამბობს გახელაძე. მაუწყებელმა უკვე დაიწყო მზადება ქუთაისიდან პარლამენტის სხდომების ტრანსლაციისთვის.

გახელაძის განცხადებით, არსებობს უფრო დიდი პროექტი, რომელიც ტელევიზიისთვის ახალი შენობის აგებას ითვალისწინებს. ახალი შენობა, სავარაუდოდ, დიდ დიღომში განთავსდება. ახალი შენობის მშენებლობა, გახელაძის აზრით, მაქსიმუმ, 5 მილიონი ლარი შეიძლება დაჯდეს და, სავარაუდოდ, 2013 წელს დასრულდება. წელსვე იგეგმება საზოგადოებრივი მაუწყებლის ვალების გადახდის დაწყებაც.

გახელაძისვე განცხადებით, საზოგადოებრივი მაუწყებლის შენობა ავარიული და მოძველებულია. თუმცა კულუარებში გავრცელებული ინფორმაციის თანახმად, საზოგადოებრივი მაუწყებლის ახლანდელი შენობა დიდი ხანია, გაყიდულია. მაუწყებლის თანამშრომლები ჯერ კიდევ 4 წლის წინათ საუბრობდნენ შენობიდან გადასვლაზე.