საზოგადოება
„100 ქართული ძეგლი „Google Map“-ზე“
თბილისი, 10 იანვარი, საქინფორმი. „100 ქართული ძეგლი Google Map-ზე“, – ასე ჰქვია ახალ პროექტს, რომლის პრეზენტაციას საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ვაჩეიშვილი და იუსტიციის სამინისტროს საჯარო რეესტრის თავმჯდომარე სოსო წიქარიშვილი დაესწრნენ. პროექტის პრეზენტაცია კულტურული მემკვიდრეობის დაცვის ეროვნულ სააგენტოში გაიმართა.კულტურული მემკვიდრეობის დაცვის ეროვნული სააგენტოს ინფორმაციით, 2012 წელს სააგენტოს ერთ-ერთი მთავარი პრიორიტეტი სწორედ კულტურული მემკვიდრეობის პოპულარაიზაცია იქნება. „ამ მიმართულებით, წლის პირველი პროექტი უკვე განხორციელდა. ასამდე ქართული ძეგლი მათივე ზუსტი კოორდინატებით „Google Map“-შია ინტეგრირებული.
პროექტი საქართველოს კულტურული მემკვიდრეობის დაცვის ეროვნული სააგენტოსა და საქართველოს იუსტიციის სამინისტროს საჯარო რეესტრის ურთიერთთანამშრომლობით განხორციელდა. „Google“-ს ადმინისტრაციასთან მოლაპარაკებებს საჯარო რეესტრის ეროვნული სააგენტო აწარმოებდა. საჯარო რეესტრში წელიწად-ნახევარის განმავლობაში გეოგრაფიული და სივრცობრივი მონაცემები გროვდებოდა იმისთვის, რომ მსოფლიოში ერთ-ერთ ყველაზე პოპულარულ საიტზე ჩვენი ქვეყნის შესახებ დეტალური ინფორმაცია განთავსებულიყო. ინტერაქტიური რუკის შექმნაზე საჯარო რეესტრის „GIS-ჯგუფი“ აქტიურად მუშაობდა“, – ნათქვამია კულტურული მემკვიდრეობის დაცვის ეროვნული სააგენტოს განცხადებაში.
მათივე ინფორმაციით, „Google Map“-ზე უკვე შესაძლებელია ასამდე ქართული ძეგლის მარტივად და სწრაფად მოძიება, საქართველოს კულტურული მემკვიდრეობის ძეგლთა ნუსხაში შემავალი დანარჩენი ძეგლები კი „Google Map“-ზე ეტაპობრივად განთავსდება.
„თითოეულ ობიექტს თან ერთვის სრულყოფილი, სასარგებლო ინფორმაცია, გეოგრაფიული კოორდინატები და ა.შ. რუკის ინსტრუმენტებით შესაძლებელია სივრცითი ანალიზი, ობიექტებს შორის მანძილის განსაზღვრა, კონკრეტული ადგილის მოახლოება ან დაშორება (ზუმირება). „Google Map“-ზე ძეგლების განთავსება საქართველოს უძველესი არქიტექტურისა და მისი მხატვრული ღირებულების წარმოჩენას კიდევ მეტად შეუწყობს ხელს“, – აღნიშნულია განცხადებაში.
