თბილისი, 9 იანვარი, საქინფორმი. როგორც უფლებადაცვითი საზოგადოებრივი ორგანიზაციის – „ახალგაზრდები სამართლიანობისათვის – საქართველო“– პრესსამსახური საქინფორმს ატყობინებს,  საქართველოს სასჯელაღსრულების დაწესებულებებში მყოფი ავადმყოფი პატიმრები დიეტური საკვებით ვერ კმაყოფილდებიან და ამ მხრივ ორგანიზაცია საკითხის გადაჭრას მოითხოვს.

ორგანიზაციის მიერ გავრცელებულ შეფასებაში ნათქვამია, რომ სასჯელაღსრულების დაწესებულებებში მყოფ ავადმყოფ პატიმრებს არ აქვთ შესაძლებლობა, დაიცვან ექიმის მიერ დანიშნული და ხშირად სასიცოცხლოდ აუცილებელი დიეტა. საპატიმროს კვების რაციონი მზადდება გაურკვეველი წარმოშობის ცხიმით, რომელსაც ისეთი სპეციფიკური, არასასიამოვნო სუნი და გემო აქვს, რომ პატიმრები იძულებულნი არიან, საკვები მიღებამდე „გარეცხონ“ გამდინარე წყლით.

ორგანიზაციის დაცვის ქვეშ მყოფ ერთ-ერთ პატიმარს გულის უმძიმესი დაავადება აქვს. საკვები, რომელიც მას მიეწოდება სასჯელაღსრულების დაწესებულებაში, სახიფათოა მისი ჯანმრთელობისათვის. ორგანიზაციის ადვოკატები პატიმრის შესაბამისი დიეტური საკვებით უზრუნველყოფას ითხოვდნენ, მაგრამ – ამაოდ. ადვოკატების განმარტებით, სასჯელაღსრულების, პრობაციისა და იურიდიული დახმარების საკითხთა სამინისტროს სამედიცინო დეპარტამენტის უფროსმა პატიმარს პროდუქტის ყიდვა დაწესებულების ტერიტორიაზე არსებულ მაღაზიაში ურჩია.

„ციხის ტერიტორიაზე არსებულ მაღაზიაში პატიმარს ყოველთვიურად ხუთას ლარამდე ოდენობის თანხის დახარჯვის უფლება აქვს. ხშირ შემთხვევაში, პატიმრებს არ აქვთ შესაბამისი ფულადი სახსრები საჭირო საკვების შესაძენად. არც დაწესებულებებში არსებული მაღაზიები გამოირჩევა დიეტური საკვების ფართო არჩევანით. ძირითადად, იყიდება დაკონსერვებული და შებოლილი ნახევარფაბრიკატები. დიაბეტის მძიმე ფორმით დაავადებული პატიმრებისათვის დაწესებულებაში არსებული მენიუ სრულიად მიუღებელია. ასეთი მძიმე და უკურნებელი სენით დაავადებული პატიმრები უნდა გათავისუფლდნენ სასჯელის მოხდისაგან ან სასჯელის მოხდა უნდა გადაუვადონ.

ადამიანის იძულება – მიიღოს მისთვის საშიში საკვები, არ ემსახურება სასჯელის მიზნებს და სახელმწიფოსაც დამატებით პრობლემას უჩენს. პატიმრები, რომლებიც ვერ იცავენ დიეტას, საბოლოო ჯამში, ისევ სახელმწიფოს ხარჯზე ხდებიან სამკურნალო, სასჯელაღსრულების დაწესებულებებში კი ყველა დაავადების სათანადო მკურნალობა შესაძლებელი არ არის“, – ნათქვამია განცხადებაში.

ორგანიზაცია მძიმე და განუკურნებელი სენით დაავადებული პატიმრების უფლებების დაცვის პროექტს ახორციელებს და საპატიმროებში ამ კუთხით არსებულ მდგომარეობას პერიოდულად წარმოადგენს. პროექტის ფარგლებშივე, მძიმე და უკურნებელი სენით დაავადებული პატიმრის ოჯახებს, ცხელი ხაზის 2306935 მეშვეობით, შეუძლიათ ისარგებლონ უფასო იურიდიული დახმარებითაც.