თბილისი, 3 იანვარი, საქინფორმი. გაზეთი „კვირის პალიტრა“ გასულ კვირას  წერდა, რომ ხელოვნების მსახურთათვის „ნაცკავკასიური წრე“ თანდათან ვიწროვდება, სადაც ნეიტრალურად განწყობილი აპოლიტიკური ადამიანებისთვის ადგილი აღარ რჩება. ეს პროცესი კულტურის მინისტრ ნიკა რურუას განცხადებამ უფრო გაამძაფრა. ხელისუფლების „ნაციონალური პათოსი“ ხელოვანთა ერთმა ჯგუფმა გააპროტესტა. მათ შორის ნანი ბრეგვაძეც აღმოჩნდა, რაც, ალბათ, მის პრინციპებს უნდა მივაწეროთ, ვიდრე პოლიტიკას. ის, რომ „ბიძინა ივანიშვილი ქვეყნის მტერია“, ქალბატონმა ნანიმ ვერაფრით დაიჯერა. როგორ შეხვდა ახალ 2012 წელს, რატომ განაცხადა უარი საახალწლო კონცერტში მონაწილეობაზე და რას ფიქრობს ივანიშვილის ქველმოქმედებაზე, ნანი ბრეგვაძემ „კვირის პალიტრასთან" ინტერვიუში ისაუბრა.

„არის კითხვები, რომლებზე პასუხის გაცემაც არ მინდა. ჩემთვის 2012 წელი გამორჩეულია იმით, რომ ახალ წელს პირველად ქუჩაში არ შევხვდი. ეს დღე შინ, შვილიშვილებთან ერთად გავატარე. მოკლედ, არც ერთ საახალწლო ღონისძიებაში მონაწილეობა არ მიმიღია, ჩემი შვილის, ეკა მამალაძისგან განსხვავებით, რომელსაც ახალი წლის ღამეს ქუთაისში წასვლა მოუხდა. მქონდა პატარა მიზეზი, რომლის გამოც თავი შევიკავე (დაზუსტება არ ისურვა. – ავტ.)“, - აცხადებს ინტერვიუში ბრეგვაძე.

რაც შეეხება ბიძინა ივანიშვილს, მომღერალი აღნიშნავს, რომ უფლება არ აქვს, ცუდი თქვას ადამიანზე, რომელიც თავს ევლება ხელოვან ხალხს.