თბილისი, 3 იანვარი, საქინფორმი. გუშინ, 2012 წლის 2 იანვარს, საქართველოს შინაგან საქმეთა სამინისტრომ სპეციალური განცხადება გაავრცელა. „2012 წლის 1 იანვარს შინაგან საქმეთა სამინისტროს თანამშრომლების მიერ შემჩნეული იქნა, რომ ნუცუბიძის ქუჩის №93-ში მდებარე ტელეკომპანია „მაესტროს“ ეზოდან ავტომანქანის მეშვეობით ხდებოდა სხვადასხვა ნივთების გატანა. პოლიციის თანამშრომლებმა იმ მოტივით – შეიცავდა თუ არა აღნიშნული ქმედება დანაშაულის ნიშნებს, სცადეს ავტომანქანის გაჩერება და გადამოწმება, რა დროსაც ავტომანქანის მძღოლი არ დაემორჩილა პოლიციის თანამშრომლების მოთხოვნას და გაქცევის მიზნით მოახდინა პოლიციის ავტომანქანაზე შეჯახება“. „აღნიშნული ავტომანქანა დაკავებული იქნა პოლიციის მიერ. საქმეზე თბილისის მთავარ სამმართველოში აღძრულია სისხლის სამართლის საქმე“, – აღნიშნულია განცხადებაში.

აღნიშნულ ფაქტს დღეს „რუსთავის მედიის მართვის კომპანია“ გამოეხმაურა,რომელიც პოლიციის მიერ კომპანიის თანამშრომლების დაკავებას მის წინააღმდეგ მიმართულ პროვოკაციად აფასებს. როგორც კომპანიაში განმარტავენ, 1 იანვარს შპს „რუსთავის მედიის მართვის კომპანიის“ თანამშრომლები მიხეილ ზედგენიძე და ვალერი გიკაშვილი კომპანიის მითითებით, კომპანიის ავტოსატრანსპორტო საშუალებით გადაადგილდებოდნენ, რა დროსაც, მათ ორი ავტომანქანით თავს დაესხნენ უცნობი პირები, რომელთა ავტომანქანებსაც არ გააჩნდათ პოლიციის ამოსაცნობი ნიშნები, ხოლო თავდამსხმელებს არ წარუდგენიათ პირადობის მოწმობები.