თბილისი, 17 დეკემბერი, საქინფორმი. განათლების მაქსიმალურად ხელმისაწვდომობის მიზნით, უცხოეთში მცხოვრები მოსწავლეებისთვის, სტუდენტებისა და მაგისტრანტობის კანდიდატებისთვის საქართველოს სასწავლო დაწესებულებაში მიღების წესი მარტივდება. საქართველოში სწავლის გაგრძელების უფლება მათ განაცხადის გაკეთებიდან 24 საათის განმვალობაში შეეძლებათ. მსურველთა დოკუმენტაციის ნამდვილობის დადასტურება პარალელურ რეჟიმში მოხდება.

დაინტერესებულმა პირებმა განაცხადით საქართველოს განათლებისა და მეცნიერების სამინისტროს სსიპ განათლების ხარისხის განვითარების ეროვნულ ცენტრს უნდა მიმართონ. სათანადო დოკუმენტების არსებობის შემთხვევაში, მსურველების მოთხოვნა უმოკლეს დროში დაკმაყოფილდება (განაცხადის ფორმა და თანდართული დოკუმენტების სია განთავსებულია განათლების ხარისხის განვითარების ეროვნულ ცენტრის ვებგვერდზე www.eqe.ge). უცხო ენაზე შედგენილი დოკუმენტები აუცილებელია, ქართულ ენაზე თარგმნილი და ნოტარიულად დამოწმებული იყოს.

ცვლილებების განხორციელებამდე უცხოეთიდან საქართველოში სწავლის გაგრძელების მსურველს ხანგრძლივი პროცედურების გავლა და რამდენიმეთვიანი ლოდინი უწევდა. საქართველოს განათლებისა და მეცნიერების სამინისტროს ინიციატივით, უცხო ქვეყნის მოქალაქეებს ბარიერების გადალახვა აღარ მოუწევთ.