თბილისი, 15 დეკემბერი, საქინფორმი. ექსპო-ჯორჯიას საგამოფენო პავილიონში დღეს, 15 დეკემბერს, მოზარდების მიერ შექმნილი ინოვაციური პროექტები დაათვალიერეს და გამარჯვებული პროექტების ავტორები დააჯილდოვეს საქართველოს განათლებისა და მეცნიერების მინისტრმა დიმიტრი შაშკინმა, ენერგეტიკისა და ბუნებრივი რესურსების მინისტრმა ალექსანდრე ხეთაგურმა, ეროვნული ბანკის პრეზიდენტმა გიორგი ქადაგიძემ, იუსტიციის მინისტრის მოადგილემ და საქპატენტის გენერალურმა დირექტორმა გიორგი ღვალაძემ. გამოფენა პრეზიდენტის  მიერ ინიცირებული მოსწავლე-გამომგონებელთა საერთაშორისო  კონკურსის – „ლეონარდო და ვინჩი“–  ფარგლებში გაიმართა.

კონკურსი „ლეონარდო და ვინჩი“განათლებისა და მეცნიერების სამინისტროს  შოთა რუსთაველის ეროვნული სამეცნიერო ფონდის მიერ წელს მეორედ ჩატარდა. ამის მიზეზი ის გამოხმაურება და დიდი ინტერესია, რომელიც ამ კონკურსმა მოიპოვა, იგი უკვე გასცდა საქართველოს ფარგლებს და საერთაშორისო მასშტაბი მიიღო. კონკურსში საქართველოს მოსწავლეებთან ერთად სხვა ქვეყნების ზოგადსაგანმანათლებლო დაწესებულებების 18-წლამდე მოზარდებიც ჩაერთვნენ.

კომისიის მიერ  4 საუკეთესო პროექტი შეირჩა. გრანპრის მფლობელი სოსო მამუკაშვილი გახდა გამოგონებისთვის „გონიერი მზის ენერგიის მიმღები წყარო“, იგი სასწავლო-შემეცნებითი ტურით ინგლისში გაემგზავრება. პირველ ადგილზე გასული ქართულ-უკრაინული პროექტის ავტორებს – გიორგი პოპოვსა და ბოგდან ეგიკოვს  – 5 000 ლარი გადაეცათ, მეორე ადგილზე გავიდნენ და 3 000 ლარი გადაეცათ პროექტის – „ჭკვიანი ფანჯარა“ – ავტორებს ავთანდილ ციცქიშვილს, ლაშა აბაშიძესა და რევაზ ჭანიძეს, ხოლო მესამე ადგილზე გავიდა და 2 000 ლარი ერგო მოლდოველ ვერონიკა კაზაკის. გამოვლინდნენ სხვადასხვა ნომინაციაში გამარჯვებული პროექტების ავტორებიც. გამოფენის ყველა  მონაწილე კი პორტატული კომპიუტერით დაჯილდოვდა.

კონკურსის ფარგლებში ნამუშევრები წარმოდგენილი იყო ფიზიკის, ქიმიისა და ბიოლოგიის მიმართულებებით, ასევე, სასოფლო-სამეურნეო, ენერგეტიკიას და  საინჟინრო სფეროებში. მათგან ყველაზე საინტერესო და ინოვაციური პროექტები პავილიონში გამოიფინა. მათი ავტორები ორი დღის განმავლობაში საკუთარი ნამუშევრის პრეზენტაციებს გააკეთებენ და დამთვალიერებლის კითხვებს უპასუხებენ. გამოფენას დაესწრებიან როგორც თბილისის, ისე საქართველოს სხვადასხვა რეგიონის სკოლის მოსწავლეები.