პოლიტიკა
გამოკითხულთა უმრავლესობა რუსეთთან დიალოგის განახლების მომხრეა
თბილისი, 9 დეკემბერი, საქინფორმი. როგორც ცნობილია, საერთაშორისო რესპუბლიკურმა ინსტიტუტმა (IRI) მიმდინარე წლის 27 ოქტომბრიდან 11 ნოემბრამდე სოციოლოგიური გამოკითხვა ჩაატარა. შემთხვევითი შერჩევის პრინციპით 18 წელს ზემოთ ასაკის 4 000 რესპონდენტი გამოიკითხა. კვლევის შედეგების რამდენიმე ნაწილი გასულ დღეებში გამოქვეყნდა. დღეს კი ცნობილი ხდება, რომ IRI-ის კვლევის შედეგების მიხედვით, რუსეთთან დიალოგის განახლებას გამოკითხულთა 73 % მხარს უჭერს.
კითხვაზე – „ეთანხმებით თუ არა რუსეთთან დიალოგის განახლებას?“ – გამოკითხულთა 73 %-მა განაცხადა, რომ „სრულიად ეთანხმება“, რესპონდენტთა 17 % რუსეთთან ურთიერთობების აღდგენას მხოლოდ „ნაწილობრივ ეთანხმება“. ამასთან, გამოკითხულთა მხოლოდ 4 %-თვის აღმოჩნდა დიალოგის განახლება მიუღებელი. 
