პოლიტიკა
თბილისი მოსკოვს საერთაშორისო სამართლის პრინციპების დარღვევაში ადანაშაულებს

sagareo-saminთბილისი, 7 დეკემბერი, საქინფორმი. საქართველოს საგარეო საქმეთა სამინისტრო აფხაზეთსა და სამხრეთ ოსეთში რუსეთის სახელმწიფო სათათბიროს არჩევნებზე საარჩევნო უბნების გახსნასა და ამ ტერიტორიებზე არჩევნების ჩატარებასთან დაკავშირებით სპეციალურ განცხადებას ავრცელებს, რომელსაც საქინფორმი უცვლელად გთავაზობთ:

„2011 წლის 4 დეკემბერს ოკუპირებულ აფხაზეთსა და ცხინვალის რეგიონში რუსეთის ფედერაციამ უკანონოდ, საერთაშორისო სამართლის ფუნდამენტური პრინციპების დარღვევით, საქართველოს ცენტრალურ ხელისუფლებასთან შეუთანხმებლად ჩაატარა სახელმწიფო სათათბიროს არჩევნები. ოკუპირებულ ტერიტორიებზე რუსეთის ცენტრალურმა საარჩევნო კომისიამ გახსნა 12 ე.წ. „საარჩევნო უბანი“, ხოლო არჩევნებში მონაწილეობა მიიღო ოკუპირებული ტერიტორიების მოსახლეობის იმ ნაწილმა, რომელთაც უკანონოდ ჩატარებული პასპორტიზაციის შედეგად რუსული პასპორტები დაურიგდათ და რუსეთის ფედერაციის საოკუპაციო ძალების მოსამსახურეებმა.

ამ ქმედებით რუსეთის ფედერაციამ მორიგჯერ დაარღვია საერთაშორისო სამართლის საყოველთაოდ აღიარებული პრინციპები. საქართველოს საგარეო საქმეთა სამინისტრო მოუწოდებს საერთაშორისო თანამეგობრობას, ადეკვატური შეფასება მისცეს აღნიშნულ დარღვევას“.