სამართალი
დაპირისპირება საკონსტიტუციო ცვლილებების პროექტთან დაკავშირებით
თბილისი, 6 დეკემბერი, საქინფორმი. საკონსტიტუციო ცვლილებების პროექტის გამო საპარლამენტო ოპოზიცია ერთმანეთს დაუპირისპირდა. დაპირისპირება პარლამენტის დღევანდელ პლენარულ სხდომაზე მას შემდეგ დაიწყო, რაც ფრაქცია „ერთობა სამართლიანობის“ წევრებმა ჯონდი ბაღათურიამ და დიმიტრი ლორთქიფანიძემ საკონსტიტუციო ცვლილებების პროექტის განხილვის შეჩერება მოითხოვეს, რომლითაც დეპუტატების რაოდენობა 150-დან 190-მდე უნდა გაიზარდოს.
ლორთქიფანიძემ საპარლამენტო უმცირესობას მიმართა, რომ ხელისუფლება კონსტიტუციის დარღვევაზე პასუხისმგებლობას საპარლამენტო უმცირესობას ჰკიდებს და მოუწოდა, ამ პასუხისმგებლობაზე უარი ეთქვათ. საპარლამენტო უმცირესობისადმი ეს რეპლიკა გააპროტესტა დეპუტატმა ნუგზარ ერგემლიძემ, რომელსაც დიმიტრი ლორთქიფანიძემ შეახსენა, რომ სწორედ პირველი იყო უმცირესობიდან იმ დეპუტატებს შორის, რომელთაც საკონსტიტუციო ცვლილების ინიცირებას მოაწერეს ხელი. შემდეგ კი სიტყვიერი დაპირისპირება თამაზ დიასამიძესა და ლევან ვეფხვაძეს შორის მოხდა.
კამათისa და დაპირისპირების შემდეგ კი საკონსტიტუციო ცვლილებების განხილვის შეჩერების ინიციატივით „ქრისტიან-დემოკრატებიც“ გამოვიდნენ. ლევან ვეფხვაძემ განაცხადა, რომ აღნიშნულ ინიციატივასთან დაკავშირებით როგორც ოპოზიცია, ისე ხელისუფლება უნამუსოდ იქცევა. მისი თქმით, ხელისუფლება ცდილობს, ოპოზიციის გარკვეულ ნაწილს „შეტენოს“ და აჰკიდოს პარლამენტის რიცხოვნობის გაზრდის პასუხისმგებლობა, რადგან ყველამ კარგად იცის, რომ ეს პოპულარული თემა არ არის და საზოგადოების ნაწილისთვის მიუღებელია.
