თბილისი, 2 დეკემბერი, საქინფორმი. როგორც საქინფორმს ბიძინა ივანიშვილის პრესსამდივნოდან ატყობინებენ, „ქართუ ჯგუფის“ სახელზე შემოსული ტვირთები საბაჟო ტერმინალებში მიზანმიმართულად ზიანდება.

„ხელისუფლების ზეწოლა „ქართუ ჯგუფის“ მისამართით გრძელდება. სისტემატური ხასიათი მიიღო უკვე საბაჟო ტერმინალზე „ქართუ ჯგუფის“ სახელზე შემოსული ტვირთების დაზიანებამ. დაზიანებულია „ქართუ ჯგუფისთვის“ისეთი აღიარებული ბრენდების მიერ გამოგზავნილი საქონელი, როგორიცაა: “Blu innovation”, “Crown”, “Harman”, “BSS” და ა.შ. მსგავს ფაქტებს ადგილი აქვს იმ ქართულ კომპანიებთან მიმართებაშიც, რომლებსაც ხელშეკრულების საფუძველზე „ქართუ ჯგუფისთვის“ მსგავსი სახის აუდიო-ვიდეოტექნიკა ჩამოაქვთ. მათ შორის არის „პანასონიკის“ ოფიციალური წარმომადგენელი საქართველოში, შპს „ინდენტი“, – ნათქვამია პრესსამდივნოს განცხადებაში.

ამასთან, განცხადებაში საუბარია იმაზე, რომ დღესაც უამრავი ტვირთია გაჩერებული საბაჟოზე – როგორც „ქართუ ჯგუფში“ შემავალი ორგანიზაციების კუთვნილი, ისე მათთვის სპეციალურად კონტრაქტორი ქართული კომპანიების მიერ ჩამოტანილი. შესაბამისად, გრძელდება ძვირადღირებული ტექნიკის მიზანმიმართულად დაზიანება.

ჯგუფის ეჭვს ტექნიკის გამიზნულად დაზიანების შესახებ აძლიერებს ის ფაქტიც, რომ „ქართუ ჯგუფის“ სახელზე შემოსული ტვირთების გახსნა და დეტალური  შემოწმება ხორციელდება ცალმხრივად, დაინტერესებული მხარის წარმომადგენლების თანდასწრების გარეშე.

შემოსული ტვირთების უმრავლესობა გრანტის სტატუსის მქონე საქონელია და განკუთვნილია შემდეგი საქველმოქმედო პროექტებისთვის: ფრანგული სკოლა, თბილისის სახელმწიფო უნივერსიტეტი, ოპერისა და ბალეტის თეატრი, საჩხერის რეგიონის სკოლები, თუმანიშვილის სახელობის თეატრი, საჩხერის საავადმყოფო, ბორითის ემერჯენსი, ჯ. კახიძის მუსიკალური ცენტრი, ნატანების საკონცერტო დარბაზი, რაგბის სტადიონები, ყუმისთავის მღვიმე, სარგავი მასალის ეროვნული ცენტრი და ა.შ.

ბოლო ერთი თვის განმავლობაში შემოსული ტვირთების 100% მოხვდა ე.წ. წითელ დერეფანში, ანუ გაიარა დეტალური შემოწმება, მაშინ, როდესაც წინა პერიოდში მსგავსი ტიპის გაძლიერებული შემოწმების ფაქტი 5-10% იყო.