თბილისი, 2 დეკემბერი, საქინფორმი. ტელეკომპანია „მაესტროს“ დამფუძნებლებსა და მმართველი კომპანიის წარმომადგენელ ეროსი კიწმარიშვილს შორის გუშინ ღამით გამართული რამდენიმესაათიანი მოლაპარაკებები უშედეგოდ დასრულდა – მხარეებმა ვერანაირ შეთანხმებას ვერ მიაღწიეს. კონსულტაციებში მედიატორის როლს კოალიცია „მედიის ადვოკატირებისთვის“ ასრულებდა, თუმცა ორგანიზაციამ დაპირისპირებული მხარეების მორიგება ვერ შეძლო. მოლაპარაკებების დასრულების შემდეგ „მაესტროს“ ერთ-ერთმა დამფუძნებელმა მამუკა ღლონტმა განაცხადა, რომ მიღებულია გადაწყვეტილება შენობის დატოვების შესახებ. მან და ტელეკომპანიის თანამშრომლებმა „მაესტროს“ ოფისი დატოვეს და აპარატურა წაიღეს. მათ რადიო „მაესტროში“ გადაინაცვლეს, რომლის სტუდიიდანაც უნდა განახლდეს ტელეკომპანიის მაუწყებლობა.

ტელეკომპანია „მაესტროს“ მმართველი კომპანიის დამფუძნებელი ეროსი კიწმარიშვილი კი „მაესტროსთვის“ ბრძოლას სასამართლოს გზით გააგრძელებს. როგორც თავად აცხადებს, „სასამართლოს გარდა რამდენიმე საათში საქართველოს კომუნიკაციების ეროვნულ კომისიას მიმართავს, რათა „მაესტროს“ სხვა ოფისიდან მაუწყებლობის განახლების უფლება არ მიეცეს, რადგან კიწმარიშვილი მიიჩნევს, რომ ეს იქნება არალეგალური და მმართველი კომპანიის თანხმობის გარეშე არ უნდა განხორციელდეს.