თბილისი, 1 დეკემბერი, საქინფორმი. ტელეკომპანია „მაესტროში“ ვითარება ისევ დაძაბულია. შენობაში კვლავ რჩებიან მმართველი კომპანიის წარმომადგენელი ეროსი კიწმარიშვილი და „მაესტროს“ ერთ-ერთი დამფუძნებელი მამუკა ღლონტი. არცერთი მათგანი შენობის დატოვებას არ აპირებს.

ამასთან, „მაესტროს“ დამფუძნებელთა ჯგუფი ტელეკომპანიის მმართველ კომპანიასთან კონტრაქტს წყვეტს და მათი წარმომადგენლების „მაესტროს“ შენობიდან დაუყოვნებლივ გამოსვლას ითხოვს. ამის შესახებ ოფიციალური განცხადება გუშინ, საღამოს, ტელეკომპანიის შენობასთან დამფუძნებელთა ჯგუფის წარმომადგენელმა ლევან ჩიკვაიძემ გააკეთა. მის მიერ წარმოდგენილ მიმართვასა და წერილში მოყვანილია რამდენიმე პუნქტი, სადაც დამფუძნებელთა ჯგუფი მმართველ კომპანიას და ეროსი კიწმარიშვილს რამდენიმე ძირეული პუნქტის შეუსრულებლობაში ადანაშაულებს.

კერძოდ, საუბარია ფინანსური მიმართულებით არსებულ პრობლემებზე. კონტრაქტის გაწყვეტის ერთ-ერთ მნიშვნელოვან საბაბად დასახელებულია ეროსი კიწმარიშვილისა და მისი თანმხლები პირების ტელეკომპანიის შენობაში შესვლა, რასაც დამფუძნებელი ჯგუფის წევრები შენობაში შეჭრად აფასებენ.

დამფუძნებელთა ჯგუფის წარმომადგენლების განცხადებით, ამ მიმართვას და წერილს დღეს სასამართლო ორგანოებს გადასცემენ.

ეროსი კიწმარიშვილი კი „მაესტროს“ დამფუძნებლებთან საუბარს მათი მხრიდან მხოლოდ ოფიციალური წერილის მიღების შემდეგ აპირებს. მისი თქმით, დამფუძნებლებისგან ტელეკომპანიის მმართველ კომპანიასთან კონტრაქტის შეწყვეტის შესახებ დოკუმენტი არ მიუღია.

კიწმარიშვილს ერთადერთ გამოსავლად მიაჩნია, რომ მამუკა ღლონტმა დატოვოს ტელეკომპანიის შენობა და შემდეგ დამფუძნებლებმა და მართვის კომპანიამ დაიწყონ საკითხის ლეგალური, სამართლებრივი განხილვა, რათა კონსენსუსი მოძებნონ.

ტელეკომპანია „მაესტროში“ არეულობა მას შემდეგ დაიწყო, რაც 30 ნოემბერს, დაახლოებით, 07.15 საათზე, შენობაში ეროსი კიწმარიშვილი რამდენიმე პირთან ერთად შევიდა. თანამშრომლებს მუშაობის დაწყების საშუალება არ ჰქონდათ. გათიშული იყო ტელეკომპანია „მაესტროს“ ეთერიც.

მოგვიანებით, ტელეკომპანია ეთერში მამუკა ღლონტის განცხადებით გავიდა. „მაესტრო“ ამ დროისთვის პირდაპირ ეთერში მაუწყებლობს. მაუწყებლობა ჟურნალისტთა და ტექნიკური პერსონალის ნაწილის საშუალებით ხორციელდება, რომლებმაც შენობაში შესვლა მოახერხეს.