თბილისი, 28 ნოემბერი, საქინფორმი. სამხრეთ ოსეთის პრეზიდენტობის კანდიდატი ალა ჯიოევა თავის კონკურენტ ანატოლი ბიბილოვს მოუწოდებს, არჩევნებში თავისი დამარცხება აღიაროს.

„მოვუწოდებ ანატოლი ბიბილოვს, აღიაროს თავისი დამარცხება. გაიმარჯვა ღირსეულთა შორის ღირსეულმა“, – განაცხადა ჯიოევამ ორშაბათს ცესკოს მიერ გამოქვეყნებული წინასწარი შედეგების შემდეგ.

ჯიოევას ნდობით აღჭურვილი პირი ანატოლი ბარანკევიჩი აცხადებს, რომ ალა ჯიოევა თავის მოწინააღმდეგეს საარჩევნო უბნების ოქმების 100 % -ის დამუშავების შემდეგ 5350 ხმით უსწრებს.

„ყველა ოქმზე თავად ანატოლი ბიბილოვის საარჩევნო შტაბის წარმომადგენელთა ხელმოწერები და ბეჭდებია და ამ ციფრების უარყოფა შეუძლებელია“, – აცხადებს ბარანკევიჩი.

ცესკოს მიერ გამოქვეყნებული ბოლო მონაცემებით, იმის გათვალისწინებით, რომ დამუშავებულია ბიულეტენების 50.59%, ე.წ. არჩევნების მეორე ტურში ალა ჯიოევას ხმა ამომრჩეველთა 51, 3%-მა მისცა, ანატოლი ბიბილოვს კი – 46,21 %-მა.