თბილისი, 22 ნოემბერი, საქინფორმი. რუსეთის პრეზიდენტ დიმიტრი მედვედევის მიერ გუშინ, 2011 წლის 21 ნოემბერს, ვლადიკავკაზში სამხედროებთან შეხვედრისას გაკეთებულ განცხადებას დღეს საქართველოს საგარეო საქმეთა სამინისტრო სპეციალური განცხადებით გამოეხმაურა, რომელსაც საქინფორმი უცვლელად გთავაზობთ:

„2011 წლის 21 ნოემბერს ქ. ვლადიკავკაზში 58-ე არმიის ოფიცრებთან შეხვედრაზე რუსეთის პრეზიდენტმა დ. მედვედევმა კმაყოფილება გამოთქვა იმის გამო, რომ 2008 წლის აგვისტოს ომის შედეგად შეწყდა ნატოს რიგებში საქართველოს და რიგი სხვა პოსტსაბჭოთა ქვეყნების „მიღების პროცესი“. აღსანიშნავია, რომ რუსეთის სხვა ოფიციალური პირებიც, ყველა დონეზე, სულ უფრო ხშირად აკეთებენ განცხადებებს, რომ 2008 წლის აგვისტოში საქართველოს წინააღმდეგ განხორციელებული ღია სამხედრო აგრესიის მიზეზს წარმოადგენდა სწორედ გეოპოლიტიკური ფაქტორები, კერძოდ, ნატოს გაფართოების შეჩერება. ხოლო ბოლო პერიოდში რუსეთის საგარეო პოლიტიკის ერთ-ერთ უდიდეს მიღწევად მიიჩნევა ის, რომ დღეს „საქართველო ნატოს წევრი ქვეყანა არ არის“.

დ. მედვედევის აღიარებამდეც არავითარ ეჭვს არ იწვევდა, თუ ვინ, რატომ და რა მიზნების მისაღწევად დაიწყო 2008 წლის რუსეთ-საქართველოს ომი. კრემლის ამჟამინდელი ბინადარის აღნიშნული განცხადების შემდეგ სრულიად აშკარაა, რომ 1990-იანი წლებიდან სუვერენული საქართველოს წინააღმდეგ მიმართულ რუსეთის აგრესიულ პოლიტიკას და 2008 წლის აგვისტოს ომს ჰქონდა და აქვს კონკრეტული მიზნები – ცივილიზებულ სამყაროში, კერძოდ, ევროპულ და ევროატლანტიკურ სტრუქტურებში საქართველოს ინტეგრაციისათვის ხელის შეშლა, საქართველოს დემოკრატიულად არჩეული ხელისუფლების დამხობა და მიმდინარე წარმატებული რეფორმების შეჩერება. ამასთან, რუსეთი მიზნად ისახავდა ე.წ. პრივილეგიური ინტერესების ზონის დაკანონებას, სადემარკაციო ხაზის გავლებას დემოკრატიულ სამყაროსთან და ამ საკითხზე საკუთარი შეურიგებელი პოზიციის დემონსტრირებას. უპრეცედენტო კორუფციასა და ტოტალიტარიზმში ჩაფლული რუსეთის დღევანდელ მესვეურთათვის ძალზე გამაღიზიანებელ და საშიშ ფენომენს წარმოადგენს საქართველოს, როგორც წარმატებული დემოკრატიისა და კანონიერებაზე დამყარებული სახელმწიფოებრივი აღმშენებლობის მაგალითი, ვინაიდან ასეთი მაგალითის არსებობა შეუძლებელს ხდის მათთვის, დაუსაბუთონ საკუთარ მოსახლეობას იმ მახინჯი სახელმწიფოებრივი მოდელის აუცილებლობა, რომელსაც ისინი ქმნიან. სწორედ ამიტომაც არის რუსეთის საგარეო პოლიტიკის ერთ-ერთი პრიორიტეტი საქართველოს სახელმწიფოებრიობის განადგურება. თუმცა კანონზომიერი ისტორიული პროცესების მსვლელობას და თავისუფლებისმოყვარე ერების წადილს მედვედევები ვერ შეაჩერებენ.