პოლიტიკა
"ზოოპარკი" საქართველოს პარლამენტში

dakadakaთბილისი, 22 ნოემბერი, საქინფორმი. საქართველოს პარლამენტის დღევანდელ პლენარულ სხდომაზე საპარლამენტო ოპოზიციის წარმომადგენლებმა ერთმანეთი „ლურჯ მელიასა“ და „გაყეყეჩებულ ყურშას“ შეადარეს. „ქრისტიან-დემოკრატ“ ლევან ვეფხვაძის გაღიზიანება „ქართული დასის“ ლიდერ ჯონდი ბაღათურიას სიტყვით გამოსვლას მოჰყვა, რომელმაც კოლეგები ზღაპარ „ლურჯი მელიას“ პერსონაჟს შეადარა. ვეფხვაძე დარწმუნებულია, რომ ჯონდი ბაღათურიას განაწყენება გამოიწვია უმცირესობაში მისი გაწევრების თხოვნით მიმართვის უშედეგობამ – საპარლამენტო უმცირესობაში ის ვერ მიიღეს.

ვეფხვაძე დღეს ამ გადაწყვეტილებას ნანობს. იგი დარწმუნებულია, რომ ჯონდი ბაღათურიას უმცირესობაში მიღების შემთხვევაში დეპუტატი თამაზ კვაჭანტირაძე „ქართული დასის“ ლიდერს ასწავლიდა, რომ „ლურჯი მელია“ არა ზღაპარი და მულტფილმი, არამედ სულხან-საბა ორბელიანის იგავ-არაკია. „ყურშა გაყეყეჩდა“, – აღნიშნა ვეფხვაძემ და დასძინა, რომ დეპუტატის გამოსვლამ სწორედ ეს პერსონაჟი გაახსენა.

ამის შემდეგ ლევან ვეფხვაძეს, გიორგი თარგამაძესა და ჯონდი ბაღათურიას შორის სიტყვიერი შელაპარაკება სხდომათა დარბაზში გაგრძელდა, რამაც უმრავლესობის წევრ ზურაბ მელიქიშვილის სიტყვით გამოსვლა შეაფერხა.

პარლამენტის თავმჯდომარე დავით ბაქრაძემ მანდატურის სამსახურს წესრიგის დამყარებისკენ მოუწოდა და დეპუტატებმა კამათი შეწყვიტეს.