სამართალი
სოფლის დახმარების პროგრამა არ შესრულებულა

soflis-daxmareba-2თბილისი, 18 ნოემბერი, საქინფორმი. სოფლის დახმარების პროგრამის მიზნობრიობასა და ეფექტიანობაზე სხვადასხვაგვარად მსჯელობენ გლეხები და მუნიციპალიტეტის ხელმძღვანელები. დედოფლისწყაროში, არბოშიკის, ოზაანის,ზემო ქედის, სამთაწყაროს მოსახლეობა აღნიშნავს, რომ მათთვის სოფლის პრიორიტეტული სამუშაოები არავის შეუთანხმებია. ისინი არც შესრულებული სამუშაოებით არიან კმაყოფილი. სოფელ არბოშიკის მოსახლეობა აცხადებს, რომ  სოფლის დახმარების პროგრამით 2010 წელს  განხორციელებელი წყლის რეაბილიტაციის სამუშაოები მათზე დადებითად სულაც არ ასახულა და შველას ითხოვს. დაზიანებული ტუმბოს შესაკეთებლად კი სოფლის რაიონისა და სოფლის თავკაცობა ფულს გლეხობას აწერს.

სოფლის მოსახლეობის განმარტებით, ეს არის უკიდურესად გაჭირვებული ხალხის აბუჩად აგდება. შიმშილის ზღვარზე მყოფი გლეხობის 80% სიცივეშია, ხელმძღვანელობა კი ამ ხალხს წყლის რეაბილიტაციისთვის საჭირო მასალების შეძენას აკისრებს.

როგორც ადგილობრივმა წარმომადგენელმა საქინფორმთან საუბარში აღნიშნა, სატრაბახო მუნიციპალიტეტს ნამდვილად არ აქვს – ფაქტობრივად, სოფლის დახმარების პროგრამა იქ წარმატებით კი არა, სულაც არ განხორციელებულა.

საქინფორმის წყარო განმარტავს, რომ 2010 წელს სოფელ არბოშიკში სათავო ნაგებობიდან წყარომდე ამორტიზებული  მილების შესაცვლელად დაიხარჯა 8000 ლარი. შიდა გზების შეკეთებას მიმდინარე წელს 40 000 ლარი მოხმარდა. მოსახლეობის განმარტებით, ეს ყველაფერი წყალში გადაყრილი ფულია და ეს თანხები დადებითად ხალხზე კი არა, მუნიციპალიტეტის ხელმძღვანელებზე აისახა.