საზოგადოება
პრეზიდენტის ადმინისტრაცია პატრიარქის განცხადებაზე კომენტარს არ აკეთებს
თბილისი, 15 ნოემბერი, საქინფორმი. საქართველოს პრეზიდენტის ადმინისტრაცია ბიზნესმენ და პოლიტიკოს ბიძინა ივანიშვილისთვის საქართველოს მოქალაქეობის აღდგენის შესახებ პატრიარქის მიერ გაკეთებულ განცხადებაზე კომენტარს არ აკეთებს. „ვადასტურებ სრულ პატივისცემას საქართველოს პარტიარქისადმი, მაგრამ ამ საკითხთან დაკავშირებით ჩვენ კომენტარისგან თავს ვიკავებთ“, – განაცხადა პრეზიდენტის პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე.
შეგახსენებთ, რომ სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, უწმიდესი და უნეტარესი ილია მეორე საკვირაო ქადაგებისას ბიზნესმენ ბიძინა ივანიშვილის მოქალაქეობის საკითხს გამოეხმაურა.
„დღეს ბევრი ლაპარაკია იმაზე, უნდა იყოს თუ არა ბიძინა ივანიშვილი საქართველოს მოქალაქე. რა თქმა უნდა, უნდა იყოს, იმიტომ, რომ ის ქართველია. მე ვფიქრობ, ყოველი ქართველი ადამიანი, ის დაბადებულია საქართველოში თუ უცხოეთში, რომელიც სულითა და ხორცით ქართველია, საქართველოს მოქალაქე უნდა იყოს. მე ძალიან მაწუხებს, რომ ასეთი უბრალო საკითხია და ასეთი არასასურველი კამათი გამოიწვია. დარწმუნებული ვარ, რომ ჩვენი პრეზიდენტი გაითვალისწინებს ამას და მას საქართველოს მოქალაქეობას მიანიჭებს“, – ბრძანა პატრიარქმა.
