თბილისი, 15 ნოემბერი, საქინფორმი. სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტის, უწმიდესისა და უნეტარესი ილია მეორესა და ბიზნესმენ-პოლიტიკოს ბიძინა ივანიშვილის შეხვედრის შესახებ ინფორმაცია საქინფორმს ივანიშვილის პრესსამსახურის ხელმძღვანელმა ნონა ყანდიაშვილმა დაუდასტურა, რომლის ინფორმაციით, შეხვედრა საპატრიარქოში დღეს, 2011 წლის 15 ნოემბერს, 18:00 საათზე, შედგება.

„თქვენ იცით ბატონი ბიძინას ინტერვიუ „კვირის პალიტრასთან“, რომელშიც მან უწმიდესთან შეხვედრის სურვილი გამოთქვა. ასევე, პატრიარქის მიერ დაფიქსირებული პოზიცია ბატონი ბიძინას მოქალაქეობასთან დაკავშირებით. შესაბამისად, შეხვედრის ინიციატივა ორივე მხრიდან იყო და ეს შეხვედრა დღეს შედგება“, – განმარტა საქინფორმთან საუბრისას ყანდიაშვილმა.

შეგახსენებთ, რომ ბიძინა ივანიშვილმა პატრიარქთან შეხვედრის სურვილი გაზეთ „კვირის პალიტრისთვის“ მიცემულ ინტერვიუში დააფიქსირა. „ვაპირებ, ვესტუმრო მის უწმიდესობას. ვფიქრობ, თანხმობას მივიღებ შეხვედრაზე. კათოლიკოს-პატრიარქთან სასაუბრო ბევრი მაქვს. მინდა, რჩევები მივიღო ამ ბრძენი ადამიანისგან. გარდა იმისა, რომ ის არის მართლმადიდებელი მოსახლეობის სულიერი მამა, ამავე დროს, ბრძენიც არის. მას რამდენჯერმე შევხვედრივარ და ყოველთვის სიხარულით ვიხსენებ იმ წუთებსა და რჩევებს, რაც მიმიღია“, – განაცხადა ივანიშვილმა.